BQO-da qusbegilerdiń «Qansonar» respýblıkalyq týrnıri ótip jatyr
ORAL. QazAqparat - Oral qalasy irgesindegi «Jaıyq qalashyǵy» mańynda búgin qusbegiler arasynda «Qansonar» respýblıkalyq týrnıri bastaldy, dep habarlaıdy «QazAqparat» tilshisi.
Onyń ashylý rásimine qatysqan oblys ákiminiń orynbasary Ǵabıdolla Ospanqulov mundaı jarystyń Aqjaıyq óńirinde alǵash ret uıymdastyrylyp otyrǵanyn jetkizdi.
«Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasyna sáıkes qazirgideı jahandaný zamanynda ulttyq salt-dástúrlerdi, babalarymyzdan mıras bolyp kele jatqan sport túrlerin damytýdyń mańyzy zor. Sonyń biri - qusbegilik óner. Bul oraıda Batys Qazaqstanda da tıisti jumystar qolǵa alynýda», dedi Ǵ.Ospanqulov.
Sondaı-aq QR Ulttyq sport túrleri qaýymdastyǵynyń vıtse-prezıdenti Erlen Ospanov, ulttyq sport túrlerinen memlekettik jattyqtyrýshy Ramazan Sáttibaev jarysqa qatysýshylarǵa sáttilik tiledi.
Shara ótip jatqan jerge úsh kıiz úı tigilgen, onyń bireýinde qolóner sheberleriniń buıymdary satylýda. Ekinshisinde oblystyq tarıhı-ólketaný mýzeıiniń jádigerleri qoıylǵan. Taǵy bir úıde baýyrsaq, kóje tegin taratyldy.
Erteń márege jetetin týrnırge respýblıka óńirlerinen 30-ǵa jýyq qusbegi qatysýda.
Ázirge Aqmola, Jambyl, Atyraý oblystarynyń ókilderi sátti óner kórsetýde.
