BQO-da qurylys zańnamasyn buzǵan kompanııalarǵa ₸7,3 mln aıyppul salyndy
BQO memlekettik sáýlet-qurylys baqylaýy basqarmasynyń basshysy Mádı Otarbaev óńirlik kommýnıkatsııalar qyzmeti alańynda ótken brıfıngte málim etkendeı, bıylǵy birinshi toqsanda jospardan tys 10 tekserý júrgizilip, sonyń nátıjesinde 31 ákimshilik quqyqbuzýshylyq týraly is qozǵalyp, 7 mln 365,750 myń teńge aıyppul salynǵan.
Onyń sózine qaraǵanda, eldi mekenderdiń aýmaǵynda ártúrli maqsattaǵy nysandardy óz betinshe salýǵa jol berilmeıdi.
Naqty aıtqanda, QR Azamattyq kodeksiniń 244-babyna sáıkes, memleketke tıesili, jer ýchaskeleri bolyp qalyptaspaǵan jerde, qurylysty júzege asyrǵan tulǵaǵa tıesili emes jer ýchaskesinde salynǵan, sondaı-aq qajetti ruqsat alynbaı salynǵan turǵyn úı, basqa da qurylys, ǵımarat nemese ózge de jyljymaıtyn múlik óz betinshe salynǵan qurylys bolyp tabylady.
Qazirgi tańda monıtorıng qorytyndylaryna sáıkes Oral qalasynda 9 qurylys nysanynyń óz betinshe salynǵany anyqtaldy.
Mysaly, Rýjeınıkov kóshesi 9-mekenjaıy boıynsha kóppáterli turǵyn úı qurylysyn aıtýǵa bolady. Kúni búgin atalǵan nysan boıynsha másele sotta qaralýda.
Basqarma basshysynyń aıtýynsha, ótken jyly 66 jospardan tys tekserý júrgizilip, 102 ákimshilik is qozǵalyp, 29 mln astam teńge aıypul salynǵan bolatyn.
Tekserý nátıjesinde Oral qalasynda 6 kóppáterli turǵyn úı qurylysy toqtatyldy.
Oblys ákimi Narıman Tóreǵalıevtiń hattamalyq tapsyrmasyna sáıkes basqarma Oral qalasy ákimdigimen, jergilikti polıtsııa qyzmetimen birlese otyryp, qurylys alańdaryn, qorshaýlardy, sondaı-aq irgeles aýmaqtardy qurylys normalary men erejeleriniń talaptaryna sáıkes keltirý boıynsha turaqty negizde jumys júrgizýde.
«Oblys boıynsha 60 turǵyn úı salynyp jatsa, sonyń ishinde 45 kópqabatty turǵyn úı Oral qalasynda boı kóterýde. Qazirgi kezde 25 qurylys salýshy kompanııaǵa qatysty tekseris júrgizilip, sonyń 14-iniń zań buzǵany anyqtaldy. Olardyń bári ákimshilik jaýapkershilikke tartyldy», dedi M.Otarbaev.
