BQO-da qurylǵan aýyl sharýashylyǵy kooperatıvi Reseıge et jóneltpek
ORAL. QazAqparat - Zelenov aýdanynda qurylǵan «Nıkolaı ı Ko» aýyl sharýashylyǵy kooperatıvi Reseıge et jóneltýdi kózdep otyr. Bul týraly búgin Kóshim aýylynda modýldi mal soıý beketi ashylǵan kezde belgili boldy, dep habarlaıdy «QazAqparat» tilshisi.
Bıyl kóktemde «Nıkolaı ı Ko» kooperatıvi qurylyp, onyń quramyna Kóshim aýylynan 22 qatysýshy engen. Tamyz aıynda kooperatıv «Aýyl sharýashylyǵyn qarjylaı qoldaý qory» AQ arqyly 19 mln teńge nesıege qol jetkizip, modýldi mal soıý beketin satyp alǵan. Sonymen qatar qor kooperatıv qatysýshylaryna «Bereke» baǵdarlamasy arqyly etti baǵyttaǵy 171 bas iri qara satyp alý úshin 36 mln teńge bólgen. Qazirgi tańda kooperatıv múshelerinde 300-den astam bas mal bar. Kooperatıvtiń 22 múshesiniń jeteýi maldanyp úlgerse, qalǵandary jeńildikpen nesıe alý úshin qujattaryn ázirleýde.
Osy qatysýshylardyń biri «Súndetov» sharýa qojalyǵy bazasynda ashylǵan modýldi mal soıý beketi táýligine keminde bes bas maldy qabyldap, soıa alady. Investıtsııalyq shyǵyndardyń teń jartysy memlekettik demeýqarjy esebinen ótelse, kepil retinde jabdyq qoıylǵan.
«Nıkolaı ı Ko» kooperatıviniń tóraǵasy Nıkolaı Sýprýnnyń sózine qaraǵanda, oblystyń óz ishindegi qaıta óńdeý kásiporny men saýda jelilerine ónim jetkizýmen birge Reseıge et jóneltý jóninde naqty kelisim jasalǵan. Reseılik áriptester mal soıý beketi men men mundaǵy maldyń baǵymymen tanysyp, rıza bolyp ketken. Aldaǵy ýaqytta olarǵa aı saıyn 20 tonnaǵa deıin sıyr jáne 18-20 tonna qoı etin jóneltý josparlanýda. 
Birigýdiń artyqshylyqtary bar ekendigin túsingen kooperatıv qosymsha mal bordaqylaý alańdaryn ashyp, súıek unyn, shujyq jáne basqa ónim óndiretin tseh jabdyqtaryn alýdy kózdep otyr.
Mal soıý beketiniń ashylý rásimine qatysqan oblys ákiminiń orynbasary Baǵdat Azbaev, «Aýyl sharýashylyǵyn qarjylaı qoldaý qory» AQ oblystyq fılıalynyń dırektory Arystan Arslanbaev, aýdan ákimi Ashat Shaharov sharýalardyń bul qadamyn quptap, kooperatıvterge budan bylaı da qoldaý kórsetiletinin jetkizdi.
Aıta keteıik, oblysta atalmysh qordyń qatysýymen 1200-den astam usaq sharýashylyqtyń (olardyń kópshiligi etti baǵyttaǵy) basyn biriktirgen 26 kooperatıv qurylǵan. Kooperatsııany qoldaýǵa 2,5 mlrd teńge baǵyttalǵan.
