BQO-da qurylysy uzaqqa sozylǵan 7 áleýmettik nysannyń bireýi ǵana paıdalanýǵa berildi
Batys Qazaqstan oblysynda qurylysy uzaqqa sozylǵan 7 áleýmettik nysannyń bireýi ǵana paıdalanýǵa berildi, dep habarlaıdy Kazinform.
QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Ádilhan Sabýrovtiń óńirlik kommýnıkatsııalar qyzmeti alańynda ótken brıfıngte málim etkenindeı, óńirde qurylys pen jóndeýge jyl saıyn bıýdjetten qomaqty qarjy bólingenimen, kóptegen aıaqtalmaǵan nysandar bar.
Onyń sózine qaraǵanda, agenttik tóraǵasy Ashat Jumaǵalı Memleket basshysyna esep bergen kezde respýblıka boıynsha «uzaq merzimdi qurylys» sanatyna engen 156 problemalyq áleýmettik nysan bar ekenin atap ótse, sonyń jeteýi Batys Qazaqstan oblysynda ornalasqan.
«Atap aıtqanda, Oral jylý-qýat ortalyǵyn qaıta jańartý, qalanyń soltústik-shyǵys bóligin sýmen qamtýǵa arnalǵan sorǵy stansasyn salý, Terekti aýdany Jańaómir aýylynda jeke turǵyn úı qurylysy úshin jer telimderin ınfraqurylymmen qamtamasyz etý, Qaratóbe aýdany Shalǵyn aýylynda 60 oryndyq, Kaztalov aýdany ortalyǵynda 600 oryndyq mektep qurylysy, Barbastaý-Aqjaıyq-Inder avtojolyn qaıta jańartý, Terekti-Aqsaı jolyn ortasha jóndeý sekildi nysandar. Osylardyń ishinde «Ádildik joly» RQB-men birlesken sharalar nátıjesinde Kaztalov aýylyndaǵy mektep salynyp bitti. Deppartament áleýmettik sıpattaǵy barlyq nysandarǵa iske qosylǵanǵa deıin turaqty túrde monıtorıng júrgize beretin bolady», - dedi Ádilhan Bádelhanuly.
Departament basshysynyń aıtýynsha, agenttik bıyl Oqý-aǵartý mınıstrligimen birlesip bilim salasyndaǵy sybaılas jemqorlyq táýekelderine syrtqy taldaý júrgizgen.
Sonyń nátıjesinde atalǵan salada oblysta 131 mln astam teńge bıýdjet qarajatyn jymqyrý belgileri bar derekter anyqtalyp, olardy óteý jóninde sharalar qabyldandy.
«BQO boıynsha sybaılas jemqorlyqqa qarsy qyzmettiń usynysymen jergilikti atqarýshy organdar Terekti aýdany ıÝbıleınyı aýylynda 234 jer telimin sýmen qamtamasyz etti. Sol sekildi Terekti aýdany ákimdiginiń 1014 azamatqa gaz jáne elektrmen jabdyqtalmaǵan jeke turǵyn úı qurylysy úshin jer bergeni belgili boldy. Departamenttiń usynysymen jobalyq-smetalyq qujattama ázirlenip, kommýnıkatsııalar júrgizý jumystary bastaldy. Oǵan qosa ákimdiktiń jerdi jalǵa berýden (uzartýdan) bas tartý týraly, keıinnen jer paıdalanýshylardyń paıdasyna jańa quqyqtyq aktiler shyǵarýdan bas tartý týraly 9 qaýlysynyń kúshi joıyldy. Sybaılas jemqorlyq táýekelderin syrtqy taldaý nátıjeleri boıynsha departament 8,2 mln teńge somasyna negizsiz tólengen salyq tólemderi men memlekettik bajdardy qaıtarý jóninde sharalar qabyldaý arqyly myńnan astam múgedektiń quqyǵyn qorǵady», - dedi Á.Sabýrov.
