BQO-da qurylys kompanııasynyń qyzmetkerlerin soqqyǵa jyqqan turǵyndar sottaldy

Sýdıa Aslanbek Dúısenǵalıev qaraǵan sot talqysy barysynda anyqtalǵanyndaı, oqıǵa ótken jyly 19 shildede shamamen saǵat 15.00-de Jańaqala-Chapaev joly boıynda boldy. 

Jergilikti turǵyndar, buryn birneshe ret sottalǵan Tilek Faızýllın, sondaı-aq Erjan Talǵatov, Serik Qabdolov jáne Áset Ediresqalıev masań kúıde avtokólikpen balyq aýlaýǵa shyqqan.

Sodan Jańaqala-Chapaev avtojolynda jóndeý jumystaryn júrgizip jatqan atalmysh qurylys kompanııasynyń proraby Garýsh Balaıandy kórip, toqtaǵan. 

Jol jóndeý jumysynyń barysyna narazylyǵyn bildirgen T.Faızýllın onyń armıan ultynyń ókili ekendigine kóz jetkizip, ultaralyq óshpendilikpen temirmen basynan uryp, jerge qulatqan. Keıin jol boıymen qashqan jábirlenýshini qýyp jetip, oǵan birneshe ret pyshaq siltegen.

Sottalýshylar Balaıanǵa arashaǵa túsken ýchaske bastyǵy Arslan Bısalıevti de uryp-soqqan.

Osyndaı sátti paıdalanǵan Balaıan jol boıynda turǵan «Mazda» kóligine baryp, jasyrynyp úlgergen. Osylaısha, Faızýllın adam óltirýge oqtalǵan qylmystyq is-áreketin ózine baılanysty emes mán-jaılar boıynsha aıaǵyna deıin jetkize almaǵan.

T.Faızýllınge 15 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteý belgilendi. 

Buzaqylyq nıetpen densaýlyqqa qasaqana ortasha aýyrlyqtaǵy zııan keltirgen E.Talǵatovqa eki jyl shartty merzim kesildi. 

Aldyn ala sóz baılasyp adamdar tobymen uryp-soǵýǵa qatysqan S.Qabdolov pen Á.Ediresqalıevtiń árqaısysy 100 saǵat kóleminde qoǵamdyq jumysqa jegildi. Bul ekeýi osyǵan deıin úıqamaqta bolǵandyqtan, jazalary óteldi dep tanyldy. 

G.Balaıannyń moraldyq zııandy óteý týraly talap aryzy ishinara qanaǵattandyrylyp, T.Faızýllınnen 5 mln, E.Talǵatovtan 500 myń, S.Qabdolov pen Á.Ediresqalıevtiń árqaısysynan 200 myń teńgeden óndirildi. 

Úkim zańdy kúshine engen joq. 

Eske sala keteıik, budan buryn BQO-da qurylys kompanııasynyń eki qyzmetkerin uryp-soqqan kúdiktiler ustalǵanyn jazǵan bolatynbyz.