BQO-da kúnniń ystyǵyna baılanysty órt qaýpi kúsheıip tur
ORAL. QazAqparat - Batys Qazaqstan oblysynda órttiń ystyǵyna baılanysty órt qaýpi kúsheıip tur, dep habarlaıdy «QazAqparat» tilshisi.
«Qazgıdromet» RMK BQO fılıalynyń málimetine qaraǵanda, 28-29 shilde kúnderi oblystyń keı jerlerinde kún 43 gradýsqa deıin ysıdy. Osyǵan baılanysty BQO TJ departamenti eskertý jarııalady. Bylaısha aıtqanda, Oral qalasy men aýdandarda joǵary órt qaýpi saqtalyp otyr.
Departament bastyǵynyń orynbasary, azamattyq qorǵaý maıory Nurlan Taýbekovtiń aıtýynsha, jyl basynan beri óńirde jalpy aýmaǵy 15807 gektardy quraıtyn 187 dala órti tirkeldi. Sondaı-aq 8,7 gektardy quraıtyn bir orman órti oryn aldy. Munyń basty sebepteri - otqa abaı bolmaý jáne qurǵaq shópti ruqsatsyz órteý. Ótken jyly osy merzimde jalpy aýdany 1533 gektardy quraıtyn 89 tabıǵı janý oqıǵasy tirkelgen bolatyn.
Aıta keteıik, ásirese alys dalada bolǵan órtterdi sóndirý óte qıyn, ony aýyzdyqtaý birneshe kúnge sozylyp ketedi. Mysaly, Jańaqala aýdanynda bolǵan órtten Jańajol, Másteksaı, Jańaqazan, Kópjasar aýyldyq okrýgine qarasty qumdy jaılaǵan 27 sharýa qojalyǵy men bir JShS-nyń shabyndyǵy men jaıylymy túgeldeı kúlge aınaldy. Sol sekildi Bókeı ordasy aýdanynda 19 maýsym men 19 shilde aralyǵynda onshaqty dala órti oryn aldy. Sonyń saldarynan shabyndyqtarǵa orasan zor zalal kelgeni óz aldyna, 6-7 shilde kúnderi Saraljyn aýyldyq okrýginde bolǵan úlken órtten Qurmankól qystaǵynda qorada turǵan 25 eshki tirideı janyp ketken.
