BQO-da quny 53 mln teńge turatyn 10 turǵyn úı memlekettik menshikke tirkelmegen
ORAL. KAZINFORM – Batys Qazaqstan oblysy Aqjaıyq aýdanynda satyp alý quqyǵynsyz jaldamaly turǵyn úıdi bólý salasynda zańbuzýshylyqtar anyqtaldy.
BQO prokýratýrasynyń baspasóz qyzmetinen málim etkenindeı, 2017-2025 jyldar aralyǵynda salynǵan turǵyn úılerdiń qurylysy men rásimdelýiniń zańdylyǵyna keshendi taldaý júrgizilgen.
Tekserý nátıjesinde jalpy quny 53 mln teńge bolatyn 10 turǵyn úıdiń memlekettik menshikke tirkelmegeni anyqtaldy. Buǵan turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń óz mindetterin tıisinshe oryndamaýy, ıaǵnı turǵyn úılerdi jergilikti atqarýshy organdardyń balansyna qabyldaý úshin qajetti memlekettik qyzmetterge aqy tólemeýi sebep bolǵan. Sonyń saldarynan bul turǵyn úıler quqyqtyq alańnan tys qalyp, maqsatyna sáıkes paıdalanylmaǵan.
- Prokýrorlyq qadaǵalaý sharalarynyń nátıjesinde barlyq 10 nysan tirkelip, memleket menshigine qaıtaryldy jáne olardyń zańdy mártebesi qalpyna keltirildi. Jaýapty laýazymdy qyzmetker tártiptik jaýapkershilikke tartyldy, - dep habarlady vedomstvodan.
Eske sala keteıik, budan buryn Batys Qazaqstanda 400 mln teńgeden astam alıment bereshegi óndirilgenin jazǵan bolatynbyz.