BQO-da kún kúrt jylynyp, sý tasqyny bolýy múmkin
ORAL. QazAqparat - Batys Qazaqstan oblysynda Naýryz merekesinen keıin kún kúrt jylynyp, sý tasqyny bolýy yqtımal, dep habarlaıdy «QazAqparat» tilshisi.
Oblys ákimi Altaı Kólginovtiń aıtýynsha, óńirde qańtar, aqpan aılarynda qar onsha kóp jaýǵan joq. Áıtse de aqpan aıynynyń sońǵy onkúndigi men naýryz bastalǵannan beri qar kóp jaýdy. Onyń ústine jerdiń tońy ótken jylǵydan kóp. Sondyqtan qaýip bar. Qazirgi kezde turǵyndar arasynda túsinik jumystary júrgizilýde.
«Eń bastysy, ózenderde qaýipti tustarda muzdy kesip jatyrmyz. Burynǵydaı dınamıtpen jarmaımyz, ol qorshaǵan ortaǵa zııan. Muz turyp qalady-aý degen jerlerdiń bári rettelýde. Ekinshiden, qala men eldi mekenderden qar shyǵarylýda. Kúni keshe 200 myń tekshe metr qar shyǵaryldy. Buǵan azamattar da belsene qatysýy kerek. Tasqala, Zelenov, Terekti aýdandarynda jáne Oral qalasynyń jeke úıler ornalasqan aýmaqtarynda qar kóp. Alda qar jaýady degen boljam bar. Onyń ústine Naýryz merekesinen keıin kún kúrt jylyp qana qoımaı, jańbyr jaýýy da yqtımal. Sonda jerde toń qalyń bolǵandyqtan, sý deńgeıi kóterilip ketýi múmkin. Osynyń bárine daıyn bolý úshin tıisti sharalar alynýda», dedi óńir basshysy.
pic.ffpic.com saıtynan alynǵan ıllıýstratsııalyq foto
