BQO-da kún qatty ysyp, órt qaýpi jarııalandy
ORAL. QazAqparat - Batys Qazaqstan oblysynda órt qaýpiniń kúsheıgeni jóninde eskertý jarııalandy, dep habarlaıdy QazAqparat tilshisi.
«Qazgıdromet» RMK-nyń málimetine sáıkes 21 maýsymnan bastap Oral qalasynda, Qaztalov, Terekti, Zelenov jáne Jánibek aýdandarynda ІV dárejeli órt qaýpi kútiledi.
Mundaı jaǵdaıda órt shaǵyn ot kózderinen shyǵyp, tez jaıylady.
Sonymen qatar Qaratóbe, Bórli, Aqjaıyq, Syrym, Bókeı ordasy aýdandarynda V dárejeli órt qaýpi ornatylady. Mundaıda órt kez kelgen ot kózderi men joǵary temperatýranyń áserinen paıda bolyp, óte qarqyndy janady.
Oblys aýmaǵynda aýa raıynyń jaýyn-shashynsyn bolýyna ári kúnniń ysýyna baılanysty órt qaýpi kúsheıip otyr.
Osyǵan baılanysty BQO TJ departamenti tótenshe jaǵdaılarǵa jol bermeý maqsatynda tıisti sharalardy alýda.
Departamentten túsken derekke qaraǵanda, óńirde tabıǵı órtterdiń aldyn alý jáne sóndirý baǵytynda 150 erikti órtke qarsy qurylym (2966 adam) jumys jasaıdy. Olar 9 avtotsısterna, 448 basqa beıimdelgen tehnıka, 1701 aspaly órt sóndirý quraly jáne 105 motopompamen qamtylǵan. Oǵan qosa jergilikti atqarýshy organdardyń kúsh-quraldary daıyn.
Bıyl jyl basynan beri oblys aýmaǵynda 22,1 gektardy qamtyǵan 2 orman órti, sondaı-aq 111 tabıǵı janý tirkeldi.
Eske sala keteıik, ótken jyly óńirde dala órti jıi oryn alyp, sonyń saldarynan eki adam qaza tapqan bolatyn.
