BQO-da «Kýbleı» zaýytynyń qyzmetkerleri jumysynan aıyrylýy múmkin
«Joǵarǵy sottyń kassatsııalyq alqasy 2 jyl ishinde úsh ret sot sheshiminiń zańdylyǵyn rastap, ákimdik pen Oral qalasynyń sáýletshisine jáne qurylys salýshy shaǵymyn qabyldamady.
Joǵarǵy sot qurylys ındýstrııalyq aımaqta ruqsat qujatynsyz, sondaı-aq úlestik qurylysqa ruqsatsyz salymshylar qarajaty esebinen júrgenin anyqtady. Alaıda keıinnen jaǵdaı 180 gradýsqa ózgerdi. 2,5 jyldan keıin Joǵarǵy sot tóraǵasynyń usynýymen is Oral sotyna qaıtaryldy», - dedi Talǵat Berekeshev Senatta bolǵan Úkimet saǵatynda.
Onyń aıtýynsha, jaqynda ótken Oral qalasynyń birinshi ınstantsııa soty óz sheshimimen «Kýbleıge» tıesili eki sanıtarlyq qorǵalatyn aýmaqtyń kúshin joıyp, qalanyń bas josparyna qaıshy bolsa da, ónerkásiptik aımaqta turǵyn úılerdi zańdastyrdy. Bul turǵyda ónerkásiptik aımaqta zaýyt joq degen uıǵarym jasaǵan.
«Bul ındýstrııalyq aımaqtaǵy turǵyn úılerdi zańdastyrý úshin ádeıi jasaldy dep sanaımyn. 750 otbasynyń nemese 2,5 myń adamnyń asyraýshysy eńbek etetin konservi zaýytynyń eńbek ujymy ne isteıdi? 31 jyldyq tájirıbesi bar, ishki naryqtyń 65 paıyzyn konservi ónimderimen qamtamasyz etip otyrǵan, tek kórshi elderge ǵana emes, alys shetelderge de eksportqa baǵyttalǵan óńdeýshi kásiporyn ne isteýi kerek? Sondaı-aq Batys Qazaqstan, Aqtóbe jáne Atyraý oblystarynan mal shaýrashylyǵy ónimderin qaıta óńdeýge ótkizip kelgen 3 myń sharýa qojalyǵy men aýyl turǵyndaryna da qıyn bolmaq», - dedi kásiporyn basshysy senatorlarǵa qarata aıtqan sózinde.
Senattaǵy Úkimet saǵatynan keıin Talǵat Berekeshev atalǵan zaýyttyń jabylýy qaýpi bar ekenin aıtty. Kásiporynnyń 2024 jylǵy 1 qańtarǵa deıingi merzimi qalǵan.
Onyń sózine qaraǵanda, eger zaýyttyń sanıtarlyq qorǵaý aımaǵynda adamdar turatyn bolsa, onda 2024 jyly óndiris jańa sanıtarlyq-epıdemıologııalyq qorytyndy almaýy múmkin. Demek, qandaı da bir jumysqa ruqsat berilmeıdi.
Sonymen qatar, «Kýbleı» JShS ónimniń sáıkestigi sertıfıkattarynan aıyrylýy saldarynan elimizdegi osy taýar óndirýshiniń jumysy toqtaýy yqtımal.
«Biz eki jyl boıy sotta jeńip keldik. Sot kezinde Indýstrııa, Densaýlyq saqtaýi, Aýyl sharýashylyǵy mınıstrlikteri barlyq qajet anyqtamalardy berdi. Olar zaýyttyń ónerkásip aımaǵynda ornalasqanyn jáne qurylys salýshylar men ákimdik zań talaptaryn buzyp turǵanyn naqtylady. Densaýlyq saqtaý mınıstrligi de «Kýbleıde» sanıtarlyq qorǵaý aımaqtary qurylǵanyn rastady.
Aýyl sharýashylyǵy mınıstrligi zaýyt jumys istep turǵanyn jáne ónim óndiretinin rastady. Endi osydan bes aı buryn ótken qalalyq sot barlyq qujattyń kúshin joıa saldy», - dep túsindirdi kásiporyn basshysy.
Talǵat Berekeshev salynǵan turǵyn úı kesheninde adamdar turǵanyna qarsy emes ekenin, alaıda sol aýmaqtaǵy kásiporynnyń jabylýy qaýpi baryn aıtty.