BQO-da qýaty 12 megavatt bolatyn jańa jylý elektr týrbınasy iske qosyldy
ORAL. KAZINFORM – Oral qalasyndaǵy jylý elektr ortalyǵynda qýaty 12 megavatt bolatyn jańa №1 týrbına paıdalanýǵa berildi.
Tozyǵy jetken týrbına buǵan deıin 10 jyl boıy jaramsyz kúıde turǵan. Onyń ornyna 3,2 mıllıard teńgege jańasy satyp alynyp, iske qosyldy.
Qazirgi ýaqytta jylý elektr ortalyǵyndaǵy óndiris 46 MVt-ty quraıdy. Jańa týrbınanyń arqasynda óndiriletin elektr energııasynyń qýaty 12 MVt-qa artady.
– Memleket basshysy Qasym-Jomart Toqaev óz sózinde energetıkalyq qaýipsizdikti qamtamasyz etý basty mindettiń biri ekenin atap ótken bolatyn. Oblysymyzda energııany tutyný qarqyny jyldan jylǵa artyp keledi. Keıingi 10 jyl ishinde elektr qýatyn tutyný kólemi 30%-ǵa ósti. Osy oraıda energııa qýattylyǵyn arttyrýdyń mańyzy joǵary ekenin aıta ketken jón. Búgingi iske qosqan jańa týrbına turǵyndarymyzǵa beriletin elektr energııasynyń mólsherin arttyrýǵa yqpal etedi,- dedi Narıman Tóreǵalıuly.
Aıta ketý kerek, keıingi eki jyldyń ózinde jylý-energetıka salasyn jańǵyrtý maqsatynda bıýdjetten 15,6 mıllıard teńge kóleminde qarjy bólingen. Soǵan oraı birqatar mańyzdy joba iske qosyldy. Atap aıtqanda, nasostyq stansadaǵy taratý qurylǵysy, gradırnıa, jańa qazandyq, №2 jáne №5 jylý magıstralin qaıta jańǵyrtý, sondaı-aq Zashaǵan kentindegi jańa qazandyqtyń qurylysy jandandy.
Sonymen qatar Japonııanyń áıgili «Hitachi» týrbınasyna jóndeý jumystary bastaldy. Bul – ekijaqty kelissózderdiń oń nátıjesi.
2035 jylǵa deıingi aralyqty qamtıtyn, 32 jobadan turatyn jol kartasy bekitilgen bolatyn. Onda qysqa merzimdi — jalpy quny 33,9 mlrd teńgege 6 joba; orta merzimdi — 117,7 mlrd teńgege 12 joba; uzaq merzimdi — 135,1 mlrd teńgege 13 joba qarastyrylǵan.
Qazirgi tańda qysqa merzimde iske asyrylýy tıis jobalar daıyn. Olar: Oral qalasy men Zashaǵan kentindegi №1 jáne №2 qazandyqtardyń jylý jelilerin jańartý, 6 jáne 7-jylý magıstralderin qaıta qurý, Qurylysshy jáne Soltústik-Shyǵys shaǵynaýdandaryndaǵy ishki jylý jelilerin aýystyrý jobalary. Sonymen qatar jylý elektr ortalyǵyndaǵy №3 týrboagregat, úsh jylý magıstrali men úsh energetıkalyq qazandyqty jańartý jobalary da ázirlenip jatyr.
Eske sala keteıik, buǵan deıin Túrkistan oblysynda 1 000-ǵa jýyq adamdy jumyspen qamtıtyn zaýyt qurylysy bastalǵanyn jazǵan edik.