BQO-da kitaphana esepshileri memleketke 46 mıllıon teńgege jýyq zalal keltirgen
ORAL. KAZINFORM – BQO boıynsha ekonomıkalyq tergep-tekserý departamenti Terekti aýdany ortalyqtandyrylǵan kitaphana júıesiniń qyzmetkerlerine qatysty asa iri kólemde bıýdjet qarajatyn jymqyrý deregi boıynsha tergeýdi aıaqtady.
Departamenttiń baspasóz qyzmeti málim etkenindeı, memlekettik mekemeniń bas esepshisi men esepshisi 2023 jyldan bastap 2025 jylǵa deıingi kezeńde qylmystyq sóz baılasý arqyly jalaqy tólemderin oıdan shyǵarylǵan adamdarǵa (óli jandarǵa) eseptep jazǵan. Sodan soń qarajatty ózderiniń bank kartalaryna aýdaryp otyrǵan.
– Terekti aýdany ortalyqtandyrylǵan kitaphana júıesi býhgalterleriniń zańsyz áreketterinen memleketke 45 mln 989,905 myń teńge kóleminde zalal keltirilgen. Departament qyzmetkerleri qabyldaǵan sharalardan soń kináliler anyqtalyp, memleketke keltirilgen zalal tolyq kólemde óteldi. Qazirgi ýaqytta sotqa deıingi tergep-tekserý aıaqtalyp, is sotqa joldandy. QR Qylmystyq is júrgizý kodeksiniń 201-babyna sáıkes tergeý múddesinde ózge aqparat jarııalaýǵa jatpaıdy, - dep habarlady vedomstvodan.
Eske sala keteıik, budan buryn BQO-da bankrottyq basqarýshy kásiporyn qarjysyn (46,4 mln teńge) zańsyz aýdarǵanyn jazǵan edik.