BQO-da kishkentaı qyzdy zorlaǵan er adam ómir boıyna bas bostandyǵynan aıyryldy

ORAL. KAZINFORM – BQO qylmystyq ister jónindegi mamandandyrylǵan aýdanaralyq sotynda M. degen er adamǵa qatysty úkim shyqty.

Atalmysh sottan túsken málimetke qaraǵanda, oǵan QR QK 125-baby 3-bóligi 2-1-tarmaǵy (kórineý kámeletke tolmaǵan adamdy urlaý), 121-baby 4-bóligi (kúsh qoldanyp jáne jábirlenýshiniń dármensiz kúıin paıdalanyp seksýaldyq sıpattaǵy zorlyq-zombylyq jasaý), sondaı-aq 120-baby 4-bóligine (zorlaý) sáıkes aıyp taǵyldy. 

Sot talqysynda anyqtalǵanyndaı, bıylǵy 22 tamyzda keshkisin Tasqala aýdany Tasqala aýylynda er adam jábirlenýshiniń kishkentaı qyz ekenin bile tura, dúkennen táttiler satyp alyp berip, aldaǵan. Sosyn adam júrmeıtin jerge alyp shyǵyp, zańsyz ustaǵan. Aqyry jynystyq qol suǵylmaýshylyqqa qarsy qylmysqa barǵan. 

Prokýror aıyptaýdy tolyq qoldap, sottalýshyny ómir boıyna bas bostandyǵynan aıyrýdy surady. 

- Sot úkim shyǵarǵan kezde M-nyń buryn aýyr qylmysy úshin sottalǵanyn, jaza merziminiń ótelmegenin, onyń áreketinde qaýipti retsıdıv bar ekendigin eskerdi. Osylaısha, sottalýshy ómir boıyna bas bostandyǵynan aıyrý jazasyn qaýipsizdigi tótenshe qylmystyq-atqarý júıesi mekemesinde óteýge kesildi. Sot úkimi zańdy kúshine engen joq, - dep habarlady vedomstvodan. 

Eske sala keteıik, budan buryn BQO-da joǵalyp ketken qyz tabylyp, kúdiktige qatysty qylmystyq is qozǵalǵanyn jazǵan bolatynbyz.

Sondaı-aq Oralda 10 jasar qyzdy zorlaý deregi boıynsha kent ákimdigine qatysty qylmystyq is qozǵaldy.