BQO-da kirpish zaýytynyń jumysy nelikten toqtap qaldy
ORAL. KAZINFORM — Batys Qazaqstan oblysy Báıterek aýdany Rýbejın aýylynda kirpish zaýytynyń jumys istemeı turǵany jóninde áleýmettik jelide beınejazba tarady.
Aýyl turǵyndarynyń sózine qaraǵanda, kirpish zaýyty ótken jylǵy 5 qarashada jabylǵan. Sodan beri alty aıdan astam ýaqyt boıy adamdar jumyssyz otyr.
- Aýylda basqa mundaı óndiris orny joq. Oral qalasyna baryp jumys isteýge taksımen baryp kelý úshin 2 myń teńge kerek, túski tamaǵy taǵy bar. Úsh jyl boıy únemi tekserýdiń saldarynan zaýyt jumys jasaı almaı otyr. Kásiporynda barlyq ruqsat qujattary bar. Sondyqtan zaýyttyń ashylýyn talap etemiz, - deıdi turǵyndar.
Osy máselege oraı Kazinform tilshisi Báıterek aýdany ákimdigine arnaıy saýal joldady.
Ákimdikten túsken málimetke qaraǵanda, «134» JShS Rýbejın aýylyndaǵy eski zaýytta keramıkalyq kirpish óndirýmen aınalysqan. Ónim kólemi men sapasyn arttyrý maqsatynda kásiporyn ınvestıtsııalyq jobany júzege asyrýdy, atap aıtqanda, jylyna 30 mln dana kirpish óndiretin jańa zaýyt qurylysyn qolǵa aldy.
Zaýyttyń úzdiksiz jumys isteýi úshin saz balshyq qory bar tıisti shıkizat bazasy kerek boldy. Zelenov (qazirgi Báıterek) aýdany ákimdiginiń 2007 jylǵy 26 qarashadaǵy № 490 jáne BQO ákimdiginiń 2007 jylǵy 4 mamyrdaǵy № 127 qaýlysymen kásiporynǵa 13,4 ga jer telimi berildi. Bul jer eldi mekender jeri sanatyna jatady. Saz balshyq merzimi 2035 jyly bitetin kelisim-shartqa sáıkes óndirildi.
Oblys pen aýdannyń memlekettik organdary qurylys kezinde «Damý» qory arqyly nesıe alýdy rásimdeý, sheteldik mamandardyń kelýine ruqsat alýǵa baılanysty qoldaý kórsetti.
2021 jyly zaýyt qurylysy aıaqtalyp, keramıkalyq kirpish óndirýge kiristi. Jumysqa Rýbejın aýylynyń turǵyndary tartylyp, olardyń sany 51 adamǵa jetti.
Ákimdik málimeti boıynsha zaýyt jumys jasaǵan bir jyldan keıin V.Anıýtochkın men A.Qalıevadan quralǵan «bastamashyl top» respýblıka, oblys jáne aýdannyń memlekettik organdaryna shaǵymdanýdy bastady. Shaǵymda kásiporynnyń erekshe qorǵalatyn aýmaqta ornalasqan karerde saz balshyqty zańsyz óndirip jatqany jazyldy. Atalǵan jerlerge Kırsanov memlekettik tabıǵı qoryqshasynyń qujaty daıyndalǵan 2010 jyly erekshe qorǵalatyn aýmaq mártebesi berilgen. Al «134» JShS jerdi odan buryn, 2008 jyly jalǵa alǵan bolatyn.
- Atalǵan eki adam úsh jyl boıy zaýyttyń qalypty qyzmetine kedergi jasap keledi. Sol shaǵymdar boıynsha tolastamaıtyn tekserýlerdiń saldarynan zaýyt basshylyǵy 2026 jylǵy 1 mamyrdan bastap jumysty toqtatý týraly sheshim qabyldady. Qyzmetkerler aqysy tólenbeıtin demalysqa jiberildi. Bir bóligi qaladan eńbek ornyn taýyp, otbasyn asyraý úshin qyzmetten ketýge májbúr boldy. Qazirgi tańda Báıterek aýdany ákimdigi BQO tabıǵı resýrstar jáne tabıǵat paıdalanýdy retteý basqarmasymen birlesip «134» JShS-ǵa saz balshyq qory bar jańa shıkizat bazasyn berý baǵytynda jumystar júrgizýde. Mundaı talaptarǵa saı keletin jer «Jaıyqmunaı» jeke kompanııasynyń aýmaǵynda belgilendi, ruqsat qujattaryn rásimdeý qosymsha ýaqytty qajet etedi. Qazirgi kezde qajetti qujattar kelisilýde. Atalǵan jaǵdaı Báıterek aýdany ákiminiń baqylaýynda, - delingen resmı jaýapta.
«134» JShS dırektory ári quryltaıshysy Ivan Lazovskıı birneshe jyl boıy atalǵan eki adamnyń shaǵymdaryna jaýap berýmen sharshaǵanyn, sol sebepti zaýyttyń jumysyn toqtatýǵa májbúr bolǵanyn jetkizdi.
Eske sala keteıik, budan buryn BQO-da tabylǵan medıtsınalyq qaldyqtardyń jaı-japsary belgili bolǵanyn jazǵan edik.
