BQO-da kran mashınısiniń qaza tabýy: Komıssııa qurylyp, arnaıy tergep-tekserý júrgiziledi
ORAL. KAZINFORM — BQO boıynsha eńbek ınspektsııasy departamentine «Bıznes-Plan» JShS-nen Báıterek aýdany Mıchýrın aýylyndaǵy «Eýrazııa» turǵyn úı kesheniniń qurylys alańynda (Prıdorojnaıa kóshesi 87/1) adam ólimine ákep soqqan jazataıym oqıǵanyń bolǵany jóninde habarlama túsken.
Departament basshysy Asylulan Dosjanovtyń málim etkenindeı, jumys berýshiniń habarlamasyna sáıkes, 7 qarashada shamamen saǵat 10.30-da munaraly kran qulaǵan. Oqıǵa saldarynan 1964 jyly týǵan kran mashınısi qaza tapqan.
Arnaıy tergep-tekserýdi uıymdastyrý úshin departament komıssııa qurý jumystaryn júrgizýde. Onyń quramyna Batys Qazaqstan oblysy tótenshe jaǵdaılar departamentiniń, ónerkásiptik qaýipsizdik basqarmasynyń mamandaryn engizý kózdelýde.
— Arnaıy tergep-tekserý barysynda jazataıym oqıǵanyń mán-jaılary men sebepteri anyqtalyp, eńbek qaýipsizdigi jáne eńbekti qorǵaý talaptarynyń saqtalýyna baǵa beriledi. Tergep-tekserý aıaqtalǵanǵa deıin krannyń qulaý sebepteri men naqty tulǵalardyń jaýapkershiligi týraly qorytyndy jasaýǵa erte. Qosymsha aqparat tergep-tekserý nátıjeleri boıynsha usynylady, — dedi A.Dosjanov.
Eske sala keteıik, budan buryn BQO-da qurylys alańynda kran qulap, er adamnyń mert bolǵanyn jazǵan edik.
