BQO-da qojalyq basshysy 70-ten astam jylqynyń egisti taptaǵany úshin qarjy óndirip aldy

ORAL. KAZINFORM — Shyńǵyrlaý aýdandyq soty sharýa qojalyǵy basshysynyń materıaldyq shyǵyndy óndirý týraly talap aryzyn ishinara qanaǵattandyrdy.

BQO sotynyń baspasóz qyzmetinen málim etkenindeı, qojalyq basshysy úsh turǵynnyń jylqylary arpa egistigin taptaǵany úshin materıaldyq shyǵyndy óndirý týraly ótinishpen júgingen.

Sotta anyqtalǵanyndaı, jaýapkerler 71 jas jylqyny baqpaı, sonyń saldarynan mal arpa egistigine túsken. Arpa alqabynyń taptalý deregi men jaýapkerlerdiń kinási is materıaldarymen rastaldy. 

- Sot sheshimimen QR Azamattyq kodeksiniń 935-babynyń talaptary eskerilip, talap qoıý ishinara qanaǵattandyryldy. Jaýapkerlerden talapker paıdasyna birlesken túrde 900 myń teńge óndirildi. Jaýapkerler sot qaýlysymen kelispeı, apellıatsııalyq tártippen shaǵym túsirdi. Batys Qazaqstan oblystyq soty birinshi satydaǵy sottyń tujyrymymen kelisip, sheshimdi ózgerissiz qaldyrdy. Qaýly zańdy kúshine endi, - dep habarlady vedomstvodan.

Eske sala keteıik, budan buryn Batys Qazaqstanda 51,2 mln teńge ákimshilik aktiniń kúshi joıylǵanyn jazǵan bolatynbyz.