BQO-da kóshi-qon zańyn buzǵan 445 sheteldik jaýapqa tartyldy
ORAL. QazAqparat - Batys Qazaqstan oblysynda «Jasyryn kóshi-qon - 2018» sharasy kezinde tórt kúnde 445 sheteldik jaýapqa tartyldy, dep habarlaıdy QazAqparat tilshisi.
BQO ishki ister departamentiniń baspasóz qyzmetinen túsken málimetke qaraǵanda, olar 17-20 qyrkúıek aralyǵynda elde bolý erejesin buzǵany úshin QR Ákimshilik quqyqbuzýshylyq kodeksiniń 517-babyna sáıkes jaýapkershilikten qutyla almady.
Sonymen qatar shekara aýmaǵyndaǵy jáne jekelegen jerlerdegi tártipti buzǵan 26 sheteldik 510-bapqa sáıkes jazaǵa ilikti. Qazaqstanǵa shaqyrylǵan sheteldikterdiń ereje buzǵany úshin (518-bap) 111 qazaqstandyq azamat jaýapqa tartyldy. Sheteldik jumys kúshin paıdalaný erejesin buzǵany jáne sheteldik azamattyń zańsyz eńbek etkeni úshin (519-bap) 24 jumys berýshi jazalandy.
Oblystyq ishki ister departamentiniń qabyldaý-taratý ornyna qujatsyz júrgen 7 sheteldik jetkizildi. Sot sheshimimen 49 adam elden shyǵaryldy. Oǵan qosa elden shyǵarylǵany jóninde sot sheshimin oryndamaýdyń 7, memlekettik shekarany zańsyz kesýdiń 2 deregi anyqtaldy.
