BQO-da kóshi-qon zańnamasyn buzǵan 5 myńǵa jýyq sheteldik jaýapqa tartyldy

ORAL. QazAqparat - Oblys aýmaǵynda 2015-2016 jyldary jáne bıylǵy jyl basynan beri 211 sheteldik azamat qylmystyq quqyqbuzýshylyqqa barǵan. Sondaı-aq osy kezeńde kóshi-qon zańnamasyn buzǵan 4 760 sheteldik ákimshilik jaýapkershilikke tartyldy. Bul týraly BQO prokýratýrasynda ótken zańdylyqty, quqyqtyq tártipti qamtamasyz etý jáne qylmyspen kúres jónindegi úılestirý keńesiniń otyrysynda aıtyldy, dep habarlaıdy «QazAqparat» tilshisi.

Oblys prokýratýrasynyń baspasóz qyzmetinen túsken málimetke qaraǵanda, otyrysta 2015-2017 jyldary zańsyz kóshi-qonǵa qarsy is-qımyl boıynsha qabyldanǵan sharalardyń tıimdiligi men zańdylyǵy, oǵan qosa halyqaralyq EKSPO-2017 mamandandyrylǵan kórmesi kezinde óńirdegi qoǵamdyq-saıası turaqtylyqty qamtamasyz etý máseleleri talqylandy.

Oblys prokýrory Saparbek Nurpeıisov bul máselelerdiń mańyzdylyǵyna toqtalyp, barlyq quqyq qorǵaý organdarynyń birlesip jumys jasaýynyń qajettiligin jetkizdi. Kún tártibindegi másele boıynsha oblys prokýratýrasy 1-basqarmasy bastyǵynyń mindetin atqarýshy Talǵat Idrısov, BQO ishki ister departamenti bastyǵynyń orynbasary Talǵat Ahaev baıandama jasady.

Otyrysta memlekettik shekaradan zańsyz ótkenderdi qylmystyq jaýapkershilikke tartpaý, quqyqbuzýshylyqty durys saralamaý, sondaı qadamǵa barǵan shetel azamatyn el aýmaǵynan shyǵarý boıynsha ýaqtyly shara qabyldamaý sekildi birqatar zańbuzýshylyqtardyń bar ekendigi málim etildi. Buǵan ishki ister organdary men shekara qyzmeti qyzmetkerleriniń óz mindetterin tıisti deńgeıde atqarmaýy, basqa vedomstvolarmen ózara naqty is-qımyldyń joqtyǵy sebep bolyp otyr.

Aıtylǵan usynys-pikirlerdi eskere otyryp, zańsyz kóshi-qonǵa qarsy is-qımyl jáne EKSPO-2017 kórmesi kezinde óńirde qoǵamdyq-saıası turaqtylyqty qamtamasyz etý jónindegi is-sharalar jospary maquldanyp, bekitildi.