BQO-da qos avtokólik soqtyǵysyp, 9 adam aýrýhanaǵa jetkizildi
ORAL. QazAqparat - Batys Qazaqstan oblysynda qos avtokólik soqtyǵysyp, 9 adam aýrýhanaǵa jetkizildi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa búgin tús shamasynda Syrym aýdany aýmaǵynda boldy.
Saǵat 13.15-te Jympıty aýylynan Aqtóbege qaraı 15-20 shaqyrym jerde «Toıota Kamrı» jáne «KIA Sorento» avtokólikteriniń túıiskeni jóninde habar túsken.
Aýdandyq ortalyq aýrýhanaǵa 9 adam jetkizilse, sonyń ekeýi - kámeletke tolmaǵandar. Olar qaralý ústinde.
Osy oqıǵaǵa oraı QR QK 345-baby 1-bóligine sáıkes qylmystyq is qozǵaldy.
