BQO-da qos aýyl turǵyndary Oralǵa aspaly kópir arqyly qatynaı bastady
ORAL. QazAqparat - Zelenov aýdany Makarov aýyldyq okrýgine qarasty Sadovyı jáne Mıchýrın okrýgi Zelenyı aýylynyń turǵyndary Oral qalasyna Shaǵan ózeni arqyly aspaly kópirmen qatynaı bastady, dep habarlaıdy «QazAqparat» HAA tilshisi.
Keshe qos kópirdiń ashylý rásimine qatysqan aýdan ákiminiń orynbasary Amangeldi Toǵyzbaev osyǵan deıin atalmysh aýyl turǵyndarynyń oblys ortalyǵyna aınalma jolmen baryp nemese eski parommen qatynap, qıyndyq kórgenin, endi munyń bári artta qalǵanyn jetkizdi.
Aýdandyq qurylys bóliminiń basshysy Arman Jumabekovtiń aıtýynsha, Zelenyı aýylymen jalǵastyratyn kópirdiń uzyndyǵy 114 metr, eni 1,52 metr. Oǵan 55 mln. 588,415 myń teńge bólingen bolatyn. Sadovyımen baılanystyratyn kópirdiń uzyndyǵy 110 metr, eni 1,52 metr. Buǵan 36 mln. 057,886 myń teńge jumsaldy. Qos kópirdi de «Ýralskstroıınvest» JShS ótken jylǵy kúzde bastap, qysqa merzimde salyp bitirdi. Metaldan jasalǵan, qatty ári qalyń arqandarmen tartylǵan eki aspaly kópir qyryq bes tonnaǵa deıin salmaqty kótere alady. Oǵan qosa ózenniń qos jaǵalaýyna zákirmen myqtap bekitilgen, eń bastysy, adamdar emin-erkin óte alady.
Aıta keteıik, eki aspaly kópirge deıin jaıaý júrginshiler úshin shaǵyn kópir de salynǵan. Zelenyı men Mıchýrın baǵytyndaǵy shaǵyn kópirdiń uzyndyǵy 344 metr. Al Sadovyı men Asan baǵytyndaǵy shaǵyn kópirdiń uzyndyǵy 52 metr.
«Shyny kerek, osy kezge deıin aspaly kópirdiń joqtyǵynan kóp qıyndyq kórip keldik. Eski parom óz aldyna, keıde muz ústimen júrýge týra keletin. Qaıǵyly oqıǵalar bolmaı qalǵan joq. Ózimiz de sýǵa ketip qala jazdadyq. Sondyqtan qýanyshymyz sheksiz», dedi Sadovyı aýylynyń turǵyny Márýa Jumahmetova.
