BQO-da qorshaǵan ortaǵa eleýli túrde jaǵymsyz áser etetin 24 kásiporyn tirkelgen
ORAL. KAZINFORM — Munaı salasyndaǵy iri kásiporyndar shoǵyrlanǵan Batys Qazaqstan oblysy úshin qorshaǵan ortany qorǵaý qashanda ózekti bolyp otyr.
BQO boıynsha ekologııa departamenti basshysynyń orynbasary Syrym Tilegenovtiń óńirlik kommýnıkatsııalar qyzmeti alańynda ótken brıfıngte málim etkenindeı, qorshaǵan ortaǵa jaǵymsyz áser etetin nysandar tórt sanatqa bólinedi.
Syrym Baqtyǵalıulynyń sózine qaraǵanda, birinshisi — qorshaǵan ortaǵa eleýli jaǵymsyz áser etetin nysandar.
Ekinshisi — birqalypty, úshinshisi — bolmashy, tórtinshisi — barynsha az jaǵymsyz áser etetin nysandar.
— Batys Qazaqstan oblysy aýmaǵynda birinshi sanatqa jatatyn 24 kásiporyn bolsa, sonyń ishinde 9-y — munaıgaz, tórteýi — kommýnaldyq, úsheýi — aýyl sharýashylyǵy, altaýy — ónerkásip, jol qurylysy, qyzmet kórsetý jáne ekeýi mıneraldy ónerkásip salasyna tıesili, — dedi Syrym Tilegenov.
Onyń aıtýynsha, ekinshi sanatqa jatatyn 143, úshinshisinde 338, tórtinshisinde 1 076 kásiporyn tirkelgen.
Departament derekterine sáıkes bıylǵy tórt aıda birinshi sanattaǵy nysandarǵa qorshaǵan ortaǵa áser etýge ruqsat berý jóninde 2 memlekettik qyzmet kórsetildi. Sonyń ishinde 1 ekologııalyq ruqsat berildi. Ekinshisi boıynsha qosa berilgen qujattar QR ekologııa zańnamasynyń talaptaryna sáıkes kelmegendikten, ruqsat berýden bas tartyldy. 2 ótinish qujattardyń tolyq bolmaýy saldarynan qabyldanbady.
— Bes aı ishinde 14 nysanǵa qatysty (2024 jyly osy merzimde — 48) memlekettik ekologııalyq baqylaý júrgizildi. Tekserý nysanyna barmastan, 197 profılaktıkalyq baqylaý (80) jasaldy. Baqylaý nátıjesinde 41 zań buzý anyqtalyp, ony joıý týraly 33 nusqama (2024 jyly osy merzimde 171 buzýshylyq, 123 nusqama) berildi. 25 nusqama oryndalsa, 8-iniń oryndaý merzimi bitken joq. Zań buzý boıynsha 787,5 mln teńgege 13 ákimshilik aıyppul (2024 jyly osy merzimde — 293 mln 384,440 myń teńge, 53 aıyppul) salyndy. Sonyń ishinde qazirgi ýaqytta 759,8 mln teńgesi (12 ákimshilik aıyppul) memleket paıdasyna óndirildi, — dedi departament basshysynyń orynbasary.
Eske sala keteıik, budan buryn Batys Qazaqstanda basty ekologııalyq másele qandaı ekendigin jazǵan bolatynbyz.