BQO-da koronavırýstan qaıtqandardyń 70 paıyzdan astamy – egde adamdar
ORAL. QazAqparat – Batys Qazaqstan oblysynda koronavırýstan qaıtqandardyń 70 paıyzdan astamy – egde adamdar. Bul týraly brıfıngte oblystyq densaýlyq saqtaý basqarmasynyń basshysy Bolatbek Qaıýpov málim etti, dep habarlaıdy QazAqparat tilshisi.
Onyń aıtýynsha, bıyl indetten 110 adam kóz jumdy.
Sondaı-aq 214 adam pnevmonııa dertinen ómirden ozdy.
Bolatbek Amangeldiulynyń sózine qaraǵanda, pandemııa ýaqytynan beri úıinde qaıtys bolǵan birde-bir adam tirkelgen joq. ıAǵnı oblystyq densaýlyq saqtaý qyzmeti emdelýshilerge aýrýhanalarda da, ambýlatorlyq jaǵdaıda da barynsha kómek kórsetti.
Bastapqyda, sáýir-maýsym aralyǵynda indet Reseıde jumys istep kelgen turǵyndardan, tranzıttik júrgizýshilerden, Ózbekstan azamattarynan anyqtaldy. Al maýsym aıynan bastap oblys turǵyndary arasynda kóbeıip ketti. Mamyr aıynda Teńiz ken oryndarynda jumys isteıtin 2700-den astam adam oblysqa oralsa, solardyń basym kópshiligi COVID-19 juqtyrdy.
Munyń bári shekteý sharalarynyń jeńildetilýimen tuspa-tus keldi. Turǵyndar jappaı kóshege shyqty, dúken, saıabaqtardy aralap, serýendedi, toı, qonaqtyqqa baryp, kópshilik sharalar ótkizdi.
Ótken kezeńge jasalǵan taldaý kórsetkenindeı, kovıdtiń bar ekendigine senbeýshilik, sanıtarlyq talaptardyń saqtalýyna jaýapsyz qaraý indettiń maýsym-shilde aılarynda jappaı órshýine ákeldi.
«Jedel járdem shaqyrý táýligine 1400-ge jetip, eki ese kóbeıgende, biz qıyndyqtarǵa tap boldyq. Barlyq naýqasty qamtý múmkin bolmaı qaldy. Onyń ústine avtokólikterdiń sanıtarlyq tazalyqtan ótýge tıis bolýy medıtsınalyq kómekti keshiktirdi. Sol kezde jumysty kúsheıtý maqsatynda 63 avtokólikpen qamtylǵan jedel járdem stansasynan bólek 123 mobıldi top qurylyp, olar ambýlatorlyq em alǵan azamattarǵa qolushyn berdi. Oblys ákiminiń usynysymen barlyq memlekettik organdar avtokólik bólip, qoldaý kórsetti. Biz avtokólikterdi qalalyq emhanalarǵa bekitip berdik», dedi Bolatbek Qaıýpov.
Oblys kóleminde basqa da tıisti jumystardyń atqarylǵanyn aıtqan densaýlyq saqtaý basqarmasynyń basshysy engizilgen shekteý sharalarynyń tıimdiligin, sonyń nátıjesinde koronavırýsqa shaldyǵý kórsetkishi tómendegenin atap ótti.
«Qoǵamda sanıtarlyq talaptardy tolyq saqtamaıynsha, asa qaýipti indetti jeńý múmkin emes. Adamdardyń ózin-ózi qorǵaýy ǵana koronavırýs juqtyrýdan aman shyǵatynyn tájirıbe kórsetip otyr. Maska taǵyp, qoldy jıi dezınfektsııalap, kópshilik sharaǵa qatysýdy qysqartýdyń ne qıyndyǵy bar. Ókinishke qaraı, indettiń qaýpin sezinbeıtinder áli de kóp. Ásirese, egde adamdardy saqtaı bileıik», dep túıindedi sózin B.Qaıýpov.
Batys Qazaqstanda ótken táýlikte 5 adamnyń koronavırýs juqtyrǵany anyqtalyp, jalpy sany 6903-ke jetti.
Eske sala keteıik, budan buryn Batys Qazaqstanǵa jańadan 37 reanımobıl jetkiziletinin jazǵan bolatynbyz.
