BQO-da koronavırýstan emdelip shyqqan bes adamnyń ekeýi – Semeı men Taraz turǵyny
ORAL. QazAqparat – Batys Qazaqstan oblysynda koronavırýstan emdelip shyqqan bes adamnyń ekeýi – Semeı men Taraz qalasynyń turǵyny, dep habarlaıdy QazAqparat tilshisi.
Oblystyq juqpaly aýrýlar aýrýhanasynyń dırektory Nadııa Ahmetovanyń aıtýynsha, qalǵandary – oblys turǵyndary, olar Oral qalasy, Tasqala men Terekti aýdandarynan.
«Báriniń de jaǵdaılary qanaǵattanarlyq. Baqylaý synamalary olardyń koronavırýstan aıyqqandyǵyn kórsetti. Qazirgi kezde semeılik jáne tarazdyq turǵynnyń eline nemen jetetini sheshilýde. Aýrýhanada emdelip jatqan qalǵan naýqastar jeńil jáne ortasha halde», dedi QazAqparat tilshisine N.Ahmetova.
Osylaısha, BQO-da emdelip shyqqandar sany 41-ge jetti.
Eske sala keteıik, budan buryn Batys Qazaqstan oblysynda taǵy bes adamnyń emdelip, úıine oralǵanyn, sońǵy anyqtalǵan 4 naýqastyń úsheýi Reseıden kelgenin jazǵan bolatynbyz.
