BQO-da koronavırýspen aýyrǵandardyń kóptigine baılanysty qosymsha oryndar ashylýda
ORAL. QazAqparat – Batys Qazaqstan oblysynda koronavırýspen aýyrǵandardyń kóptigine baılanysty qosymsha oryndar ashylýda. Bul týraly oblystyq densaýlyq saqtaý basqarmasynyń basshysy Bolatbek Qaıýpov málim etti, dep habarlaıdy QazAqparat tilshisi.
Onyń aıtýynsha, qazirgi tańda oblystyq juqpaly aýrýlar aýrýhanasy naýqastarǵa tolǵan.
Soǵan baılanysty qalalyq kópbeıindi aýrýhanasynda 220 tósektik oryndar ashyldy. Sondyqtan munda josparly otalar toqtatylady. Oblystyq kópbeıindi aýrýhanasynda da jumys kóbeıedi, óıtkeni kóptegen qyzmetter soǵan aýystyrylady. Sondaı-aq naýqastardyń bir bóligi oblystyq perınataldyq ortalyq, onkologııalyq dıspanserge ornalastyrylatyn bolady.
«Koronavırýstan qaıtqan sońǵy eki adamǵa kelsek, onyń ekeýi de – egde jastaǵy adamdar. Biri 1941 jylǵy er, ekinshisi 1932 jylǵy áıel adam. Koronavırýs ınfektsııasyna qosa ekijaqty polısegmentti pnevmonııa, sondaı-aq júrek jetispeýshiligi, ateroskleroz, qant dıabetimen aýyrǵan», dedi B.Qaıýpov.
Kúni búgin juqpaly aýrýlar aýrýhanasynda 151 emdelýshi jatsa, sonyń ishinde jeńil dárejedegiler joqqa jaqyn. 130-y ortasha aýyr halde. 18 adam aýyr halde. Taǵy bir adam jasandy tynys alý apparatyna qosylǵan. Jıyrmadaı adam ottegi maskasymen tynystaýda.
Sonymen qatar 78 adam «Kýmyska» statsıonarynda jatyr. Bular – aýrý belgileri joq adamdar. Onda jataqhanada nemese basqa oqshaýlanýǵa jaǵdaıy joq jerde turatyn otbasylar da ornalastyrylǵan.
-Keshe oblysta koronavırýs juqtyrǵan 21 naýqas tirkelip, jalpy sany 1012-ge jetti. Soǵan qosa bir kúnde aýrý belgileri baıqalmaıtyn 57 adam (bulardyń jalpy sany – 379) anyqtaldy. Bul aýrýdyń órship otyrǵanyn kórsetedi. Kún saıyn qala ǵana emes, oblys aýdandarynda, memlekettik mekemelermen qatar iri kompanııalarda naýqastar anyqtalýda. Aýrý belgileri baıqalmaıtyn adamdar da úılerinde oqshaýlanyp, dárigerlerdiń baqylaýynda bolady. Alaıda bári de adamnyń sana-sezimine, jaýapkershiligine baılanysty. Ókinishke qaraı, vırýstyń bar ekendigine senbeıtinder kóp. Vırýs joq emes, bar jáne onyń kez kelgen jerde juǵýy yqtımal. Kóshede betperde kımeı, toptalyp júrý, toı-tomalaqtarǵa, túrli jıyndarǵa qatysý toqtalmaıtyn bolsa, indettiń budan da keń taralýy ábden múmkin, - dedi B.Qaıýpov.
-Bolatbek Amangeldiuly, óńirde dárigerler jetkilikti me, dári-dármekpen qamtylý jaǵy qalaı?
-Osy oraıda qazirgideı qıyn jaǵdaıda óz ómirlerin qaterge tigip, eńbek etip jatqan dárigerlerge, barlyq medıtsına qyzmetkerlerine alǵystan basqa aıtarymyz joq. Árıne, koronavırýsty emdeýge barýdan bas tartatyn áriptester de joq emes, biz olardy kinálaı almaımyz. Sonymen qatar óz erikterimen alǵy shepte júrgender de jetkilikti. Kúni búgin emdeý mekemeleri kerekti qural-jabdyqtarmen, dári-dármektermen qamtylǵan. Іndetke qarsy kúres jalǵasýda.
-Naýqastardy qandaı dári-dármekpen emdep jatyrsyzdar?
-Koronavırýsqa qarsy dáriniń joq ekendigi belgili. Tek aýrý belgilerine qarsy em jasalady. Mysaly, qyzýy kóterilse, ekpemen ony túsiremiz. Al ókpesi qysylsa, ottegi maskasyna qosylady. «Aýyryp em izdegenshe, aýyrmaıtyn jol izde», degendeı, eń bastysy, saqtyq kerek. Shekteý sharalaryn qatań saqtaı bilsek qana indetke tosqaýyl qoıa alamyz.
Eske sala keteıik, budan buryn BQO-da koronavırýs juqtyrǵandar sany myńǵa jýyqtaǵanyn jazǵan bolatynbyz.
