BQO-da koronavırýspen aýyrǵandar sany 40 paıyzǵa ósti
ORAL. QazAqparat – Batys Qazaqstan oblysynda shilde aıynda 1205 adamnan indet tabyldy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 67 paıyzynan (803) JRVI belgileri boıynsha tekserilgende anyqtaldy.
Sondaı-aq 15 paıyzy (177) buryn aýyrǵandarmen qarym-qatynasta bolǵan. 17 paıyzynan (211) profılaktıkalyq maqsatta, 1 paıyzynan (14) statsıonarǵa jatqyzý aldynda synama alynǵan.
Sońǵy aptada (1-7 shilde) aldyńǵymen (24-30 maýsym) salystyrǵanda, indet juqtyrý kórsetkishi 41,6 paıyzǵa ósti.
Nurlybek Ermekulynyń sózine qaraǵanda, aýyrǵandardyń 41 paıyzy (497) Oral qalasynda, 16 paıyzy (196) Báıterek, 15 paıyzy (175) Bórli jáne 4 paıyzy (53) Terekti aýdanynda tirkelgen.
Jas ereksheligi boıynsha 112-si – 14 jasqa deıingiler, 54-i – 15-17, 98-i – 18-25, 318-i – 26-40, 385-i – 41-60 jas aralyǵyndaǵylar, 238-i – alpystan asqandar. Syrqattanǵandardyń kópshiligi 41-60 jastaǵylar bolǵanymen, indet túrli jastaǵylar, sonyń ishinde balalar arasynda da tez taraýda. Sondyqtan qazirgideı kúrdeli kezeńde turǵyndardyń sanıtarlyq talaptardy saqtaýy asa mańyzdy.
Sońǵy aptada monıtorıng toptary 134 reıd júrgizip, 535 nysandy qamtydy. 14 nysanda karantın talabyn buzýshylyq anyqtaldy. 14 hattama toltyrylyp, 1 mln 866,8 myń teńge aıyppul salyndy. Eki nysannyń jumysyn ýaqytsha shekteý úshin ekonomıkalyq sotqa materıal daıyndalýda.
«Búgingi tańda «Ashyq« qosymshasymen oblys boıynsha barlyǵy 562 nysan jumys isteıdi. 26 sáýirden beri osy nysandarǵa úılerinde oqshaýlanýy tıis «qyzyl» jáne «sary» mártebesi bar 429 adamnyń (213-i «qyzyl», 216-sy «sary») kirmek bolǵany anyqtaldy. Karantın talabyn buzǵandarǵa ákimshilik hattama toltyrý úshin 14 qaýly berildi», dedi N.Mustaev.
Eske sala keteıik, budan buryn qazaqstandyq tennısshiniń Italııadaǵy týrnırdiń ekinshi aınalymyna shyqqanyn jazǵan bolatynbyz.
