BQO-da koronavırýspen aýyrǵan 1600-den astam adam ońaltý kýrsynan ótti

ORAL. QazAqparat – Batys Qazaqstan oblysynda jyl basynan beri koronavırýspen aýyrǵan 1 647 adam ońaltý kýrsynan ótti, dep habarlaıdy QazAqparat tilshisi.

BQO densaýlyq saqtaý basqarmasynyń basshysy Gúlnár Ábdirahmanovanyń Óńirlik kommýnıkatsııalar qyzmeti alańynda ótken brıfıngide málim etkenindeı, statsıonarlyq em alǵandar qalalyq kópbeıindi aýrýhana, Jańaqala aýdanaralyq saýyqtyrý ortalyǵy jáne medıtsınalyq-sanıtarlyq alǵashqy kómek uıymdarynda ońaltý emderin alýda.

Onyń aıtýynsha, aýyrlyq dárejesin jáne sozylmaly syrqattaryn eskere otyryp, ár naýqasqa jeke saýyqtyrý jospary jasalady. Ońaltýǵa tynys alý gımnastıkasy, drenajdy massaj, fızıoemdeý kiredi. Ońaltý kýrsy – 7-10 kún.

G.Ábdirahmanovanyń sózine qaraǵanda, óńirde epıdahýal turaqtaldy.

Kúni búgin 20 naýqas ambýlatorlyq em alýda.

Infektsııalyq statsıonarlar sany 14-ten (751 tósek) 12-ge (511 tósek) qysqardy. Qazirgi kezde 8 naýqas qalsa, sonyń úsheýiniń jaǵdaıy asa aýyr. Bulardyń úsheýi de ekpe almaǵan.

«Oblysta osy kezge deıin 273 207 adam (jospardyń 66 paıyzy) vaktsınanyń birinshi, 261 474-i ekinshi komponentimen egildi. Pfizer kompanııasynyń vaktsınasyn 10 673 adam qabyldasa, sonyń 5 530-y – jasóspirimder, 403-i – júkti, 4 731-i – bala emizetin áıelder. Sondaı-aq 67 396 adam revaktsınatsııadan ótti», dedi G.Ábdirahmanova.

Eske sala keteıik, budan buryn BQO-da koronavırýs juqtyrý kórsetkishi 58 paıyzǵa azaıǵanyn jazǵan bolatynbyz.