BQO-da koronavırýsqa shaldyqqan 40-tan astam naýqas aýyr halde jatyr
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 40 adamnyń jaǵdaıy aýyr, tórteýi asa aýyr halde.
Naýqastardyń 29-y júrek-qan tamyrlary aýrýlaryna, 11-i qant dıabetine shaldyqqan.
Invazıvti jasandy tynys alý apparatyna 4, ınvazıvti emes qurylǵyǵa 23 patsıent qosylǵan.
Taldaý kórsetkenindeı, koronavırýs juqtyrǵandardyń deni jáne aýyr halde jatqandar – vaktsına almaǵan turǵyndar.
Arman Talǵatulynyń aıtýynsha, qazirgi tańda 1451 adam ambýlatorlyq em alýda. Oǵan qosa 1459 tósektik 20 ınfektsııalyq statsıonarda 521 adam emdelýde.
Oblystyq jedel járdem stansasyna sońǵy táýlikte 914 qońyraý shalynsa, sonyń 133-i kovıdke qatysty bolyp, 44-i statsıonarǵa jatqyzyldy.
Іndet bastalǵannan beri oblys boıynsha barlyǵy 35 277 adam tirkelip, sonyń 77,2 paıyzy (27 234) jazylyp shyqty.
Bulardyń 12 891-i statsıonarlyq, 14343-i ambýlatorlyq em aldy. Kúni búginge deıin barlyǵy 683, sonyń ishinde bıyl 514 adam koronavırýstan kóz jumdy.
«Oblysta 202 545 adam vaktsınanyń birinshi, 167 514-i ekinshi komponentimen egildi. Kúni keshe óńirde 30 060 doza (15 030-y – birinshi, 15 030-y – ekinshi komponent) «QazVac» vaktsınasy jetkizilip, medıtsına mekemelerine taratyldy.
Búginnen bastap atalǵan vaktsınamen turǵyndar egilip jatyr.
Ekinshi komponentti 21 kúnnen keıin alý kerek. Ózimizdi jáne jaqyndarymyzdy koronavırýstan qorǵaýdyń eń senimdi ádisi egilý ekendigin umytpaıyq», dedi A.Qalıbekov.
Eske sala keteıik, budan buryn Batys Qazaqstanda sońǵy tórt kúnde 340 adamnan koronavırýs tabylǵanyn, 201 myńnan astam adamnyń koronavırýsqa qarsy vaktsına saldyrǵanyn jazǵan bolatynbyz.
Sondaı-aq Batys Qazaqstanda koronavırýs juqtyrý deńgeıi 12,9 paıyzǵa tómendedi.