BQO-da koronavırýsqa shaldyqqan 4 naýqastyń jaǵdaıy aýyr
ORAL. QazAqparat – Batys Qazaqstan oblysynda koronavırýsqa shaldyqqan 4 naýqastyń jaǵdaıy aýyr, dep habarlaıdy QazAqparat tilshisi.
Oblystyq juqpaly aýrýlar aýrýhanasynyń dırektory Nadııa Ahmetovanyń aıtýynsha, 56 adam - jeńil, 29 adamnyń jaǵdaıy - ortasha halde.
Al 67 adamnyń aýrýy baıqalmaı ótýde. Aýrýhanada barlyǵy 156 adam em alyp jatyr.
Kúni búginge deıin óńirde 173 adam jazylyp shyqty.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, qazirgi tańda sondaı-aq 3 adam provızorlyq, 126 adam karantındik statsıonarda jatyr. Úılerinde oqshaýlanǵan 1634 adamdy medıtsına qyzmetkerleri baqylaýda.
Oblys boıynsha koronavırýs juqtyrǵan 329 adam tirkelse, sonyń 239-y – syrttan kelgender. Sonyń ishinde 171-i – Reseıden, 67-si – Atyraý oblysyndaǵy Teńiz ken ornynan jáne bireýi Germanııadan kelgen.
Bul jerde aıta ketý kerek, osy kezge deıin Teńiz kenishinde jumys isteıtin 2570 turǵyn oralǵan. Solardyń arasynan alǵashqy test qorytyndysy teris nátıje kórsetkender de baqylanady. Sebebi úılerinde oqshaýlanǵannan keıin jeti-segiz kúndeı ótken soń aýrý belgileri baıqalyp, aýrýhanaǵa jatqyzylyp jatqandar da bar.
Sondaı-aq 90 naýqas buryn koronavırýs juqtyrǵandarmen qarym-qatynasta bolsa, sonyń 64-i – medıtsına qyzmetkerleri.
Departament mamandary óńirde koronavırýs juqtyrý qaýpi áli de seıilmegendigin, sondyqtan turǵyndar kóshede júrgende, kópshilik oryndarǵa barǵanda, araqashyqtyqty saqtap, jeke qorǵanys quraldaryn paıdalaný kerektigin jetkizdi.
Eske sala keteıik, budan buryn Batys Qazaqstanda 1,5 myńnan astam adamnyń úı karantıninde jatqanyn jazǵan bolatynbyz.
