BQO-da koronavırýs juqtyrý deńgeıi ótken jyldyń sharyqtaý shegine jaqyndady
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń aıtýynsha, tek sońǵy táýlikte 97 adamnyń indet juqtyrǵany belgili boldy.
Onyń sózine qaraǵanda, qańtar aıynda aýyrǵandar sany 1269-ǵa jetse, sonyń ishinde Oral qalasy (637) kósh bastap tur. Sondaı-aq Báıterek (251), Bórli (193), Aqjaıyq (74), Jánibek (42), Terekti (39), Shyńǵyrlaý (38), Tasqala (35) aýdandarynda indet kóbeıip barady.
Syrqattanǵandardyń 42,7 paıyzy jumys isteıtin turǵyndar bolsa, 20,4 paıyzy – zeınetkerler.
Oblystyq bilim basqarmasynyń málimeti boıynsha mektepterde 11 qańtardan bastap dástúrli sıpatta bilim alatyn 43, qashyqtan oqıtyn 27 baladan indet tabyldy.
Óńirde koronavırýstyń órshı túskenin atap ótken M.Aryspaev demalys kúnderi qoǵamdyq kóliktiń qozǵalysyn toqtatýdy usyndy.
Vedomstvo basshylarynyń esepterin tyńdaǵan oblys ákimi Ǵ.Esqalıev bul usynysty qoldap, eger koronavırýstyń taralý qarqyny kemimese, medıtsına qyzmetkerlerine qıynǵa túsetinin jetkizdi. Buǵan turǵyndardyń sanıtarlyq talapty saqtamaýy sebepshi bolyp otyr. Sondyqtan qatań is-sharalardyń koronavırýsqa tosqaýyl qoıýǵa septesetini anyq.
Jıynda memlekettik jáne jeke mekemeler qyzmetkerlerin qashyqtan jumys isteýge kóshirýdi jalǵastyrý, karantın kezinde kafeler men meıramhana ıelerine, sondaı-aq jumysynan aıyrylǵan adamdarǵa memlekettik qoldaý sharalaryn túsindirý jóninde tapsyrma berildi.
Eske sala keteıik, budan buryn Batys Qazaqstanda bir aptada 458 adamnan koronavırýs anyqtalǵanyn jazǵan bolatynbyz.
