BQO-da koronavırýs juqtyrǵandardyń deni Reseı men Atyraýdan kelgen
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń bólim basshysy Gúlmıra Kajýshevanyń brıfıngte málim etkenindeı, óńirde osy kezge deıin 272 adam aýrýǵa shaldyqsa, sonyń 219-y – shetten kelgender.
Sonyń ishinde 164 adam (80 paıyzy) Reseıden, 54-i (20 paıyzy) – Atyraý oblysynan kelgender. Atyraýdan kelgenderdiń arasynda 53-i Teńiz ken ornynda jumys isteıdi. Sondaı-aq bir adam Germanııadan kelgen. Tranzıttik júk tasymaldaýshylar arasynda 7 adamnan koronavırýs anyqtalsa, sonyń tórteýi – Ózbekstan, ekeýi – Tájikstan, bireýi – Qyrǵyzstan azamaty.
Aýyrǵandardyń 190-y – BQO, 75-i – Qazaqstannyń basqa óńirleriniń turǵyndary.
Syrqattanǵandardyń ishinde 52 adam buryn koronavırýspen aýyrǵandarmen qarym-qatynasta bolsa, sonyń 43-i densaýlyq saqtaý mekemelerinde anyqtaldy.
«Oblysta kún sanap jazylyp kele jatqandar sany qýantady. Qazir olardyń sany 121-ge jetti. Degenmen óńirde karantındik shekteý sharalary 25 mamyrǵa deıin uzartylǵanyn eske sala otyryp, turǵyndardan sanıtarlyq, gıgıenalyq talaptardy buljytpaı saqtaýdy ótinemiz. Adamdar kóp jınalatyn jerlerden tartynǵan oryndy. Dúken, dárihanalarǵa barǵan jaǵdaıda betperde, qolǵap kııýdi umytpaý qajet», dedi G.Kajýsheva.
Eske sala keteıik, budan buryn BQO-da koronavırýs juqtyrǵan sońǵy 11 naýqastyń 10-y Teńiz ken ornynan kelgenin jazǵan bolatynbyz.