BQO-da koronavırýs juqtyrǵandardyń bireýi Saratovtan, ekinshisi Atyraýdan kelgen
ORAL. QazAqparat – Batys Qazaqstan oblysynda koronavırýs juqtyrǵan áıeldiń bireýi Saratovtan, ekinshisi Atyraýdan kelgen. Bul týraly oblystyq densaýlyq saqtaý basqarmasynyń basshysy Bolatbek Qaıýpov shuǵyl ótkizilgen brıfıng barysynda aıtty, dep habarlaıdy QazAqparat tilshisi.
Onyń aıtýynsha, ekeýi de – BQO turǵyndary, olar juqpaly aýrýlar aýrýhanasyna jatqyzyldy.
Qazirgi kezde aýyrǵan adamdarmen baılanysta bolǵandar anyqtalý ústinde.
Kúni búgin karantındik jáne provızorlyq statsıonarda barlyǵy 65 adam jatyr, báriniń jaǵdaıy qanaǵattanarlyq.
BQO-nyń bas memlekettik sanıtarlyq dárigeri Muhamǵalı Aryspaevtyń sózine qaraǵanda, Reseıden kelgen áıel 24 naýryz kúni shekaradan ótken. Sodan keıin úıinde oqshaýlanǵan. Tórt-bes kúnnen soń aýrýdyń alǵashqy belgileri baıqalǵannan keıin provızorlyq gospıtalǵa jatqyzyldy.
Jalpy, ekeýiniń de jaǵdaıy jaqsy. Aýrýdyń osy eki oshaǵy boıynsha karantındik jumystar júrgizilýde.
BQO ákimi Ǵalı Esqalıev te Feısbýktegi óziniń paraqshasynda koronavırýs juqtyrǵan eki adamnyń tirkelgenin habarlap, aýrýdyń bastapqy belgileri paıda bolǵan kezde jedel járdem shaqyrylyp, olardyń oqshaýlaý oryndaryna jetkizilgenin málimdedi.
Óńir basshysy epıdemıologııalyq jáne ekonomıkalyq jaǵdaı boıynsha saýaldar týyndasa, WhatsApp +7 700 0 109 109 nómirine joldaýǵa bolatynyn jetkizdi.
