BQO-da koronavırýs juqtyrǵandardyń 88 paıyzy jazylyp shyqty
BQO Densaýlyq saqtaý basqarmasynyń basshysy mindetin atqarýshy Arman Qalıbekovtiń Óńirlik kommýnıkatsııalar qyzmeti alańynda málim etkenindeı, oblysta indetke shaldyqqandardyń jalpy sany 8963-ke jetti.
Kúni búgin sonyń 7890-y nemese 88 paıyzy jazyldy. Onyń ishinde 3667-si statsıonarda jatyp shyqsa, 4223-i ambýlatorlyq em aldy.
Іndet bastalǵannan beri 160 adam kóz jumdy.
Qazirgi tańda 185 tósektik 4 karantındik statsıonarda 38 adam jatyr. Al 359 tósektik 7 juqpaly aýrýlar aýrýhanasynda 158 naýqas emdelýde.
Jansaqtaý bóliminde jatqandar sany 18-ge jetti: 4-eýi – 40 pen 60, 10-y – 60 pen 80 jas aralyǵynda, qalǵan tórt emdelýshi – seksennen asqan. 14 naýqastyń 13-i júrek-qan tamyrlary aýrýymen, bireýi qant dıabetimen syrqattanady.
Invazıvti emes jasandy tynys alý apparatyna 6 adam qosylǵan.
A.Qalıbekovtiń sózine qaraǵanda, qosymsha 2028 tósek-oryn rezerv esebinde daıyndalsa, sonyń 1253-i juqpaly aýrýlar, 775-i karantındik statsıonarlarda.
Emhanalarda barlyq máseleler boıynsha qashyqtan keńes berý úshin saǵat 08.00-den 20.00-ge deıin sıtýatsııalyq ortalyqtar jumys isteıdi. Oblys boıynsha bul ortalyqtarǵa táýligine orta eseppen 150-200 qońyraý shalynady. Kúni búginge deıin barlyǵy 6071 qońyraý shalynǵan. Sońǵy táýlikte 179 qońyraýdyń 55,9 paıyzy (100) Oral qalasynan túsken.
«Óńirde 123 mobıldi brıgada jumys isteýde. Mobıldi brıgada táýligine 232 shaqyrýǵa barsa, sonyń 26-sy COVID-19 boıynsha. Turǵyndardy ýaqtyly aqparattandyrý úshin «109» CALL-ortalyǵy táýlik boıy jumys isteıdi. Munda turǵyndar kóptegen ózekti máseleler, sonyń ishinde COVID-19 týraly aqparat ala alady. Eger kúnine shamamen 550-570 qońyraý tússe, onyń 32-si KVI suraqtaryna qatysty. Medıtsınalyq kómekke qatysty saýaldar bolsa, emhanalardaǵy sıtýatsııalyq ortalyqqa júginý kerek», dedi Arman Qalıbekov.
Eske sala keteıik, budan buryn Batys Qazaqstanda bir otbasynyń bes adamy koronavırýs juqtyrǵanyn jazǵan bolatynbyz.
