BQO-da koronavırýs juqtyrǵandardyń 57 paıyzdan astamy - Oral turǵyndary

ORAL. QazAqparat – Batys Qazaqstan oblysynda koronavırýs juqtyrǵandardyń 57,1 paıyzy Oral qalasynda anyqtalyp otyr. Bul týraly oblys ákimi Ǵalı Esqalıevtiń tóraǵalyq etýimen ótken koronavırýsqa qarsy kúres jónindegi jedel shtab otyrysynda aıtyldy, dep habarlaıdy QazAqparat tilshisi.

Jıynda BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev pen oblystyq densaýlyq saqtaý basqarmasy basshysynyń mindetin atqarýshy Arman Qalıbekov «qyzyl» aımaqqa kirgen óńirdegi epıdemıologııalyq ahýalǵa toqtaldy.

A.Qalıbekovtiń sózine qaraǵanda, osy kezge deıin 13878 adam koronavırýs juqtyrsa, sonyń 7938-i nemese 57,1 paıyzy Oral qalasynyń úlesine tıedi.

Jyl basynan beri 4657 adamnyń syrqattanǵany anyqtaldy.

Bıyl kovıdten 50 adam qaıtsa, sonyń ishinde 28-i qańtarda, 15-i aqpanda, jeteýi naýryzda ómirden ozdy. Olardyń 27-si nemese 53 paıyzy – áıelder, 23-i (46 paıyzy) – er adamdar. 38-i (76 paıyzy) qalada, 12-si (25 paıyzy) aýdandarda turǵan.

Qaıtqandardyń 34 paıyzy – seksennen asqandar, 28 paıyzy – 40-65 jas, 24 paıyzy – 65-80 jas aralyǵyndaǵylar. 95 paıyzynyń (48-iniń) sozylmaly syrqattary bolsa, sonyń ishinde 77 paıyzy – júrek-qan tamyrlary aýrýlaryna, 12,5 paıyzy – qant dıabetine shaldyqqandar.

Oblys basshysy Ǵ.Esqalıev mektepterde, sondaı-aq avtobýstarda, qoǵamdyq tamaqtandyrý oryndarynda sanıtarlyq talaptardyń saqtalýyn baqylaýdy kúsheıtip, qajet bolǵan jaǵdaıda karantındik sharalardy qatańdatý kerektigin atap kórsetti.

Eske sala keteıik, budan buryn BQO-da bir aptada 413 adamnan koronavırýs anyqtalǵanyn jazǵan bolatynbyz.