BQO-da koronavırýs juqtyrǵandar qalalyq aýrýhanaǵa jatqyzylýda
ORAL. QazAqparat – Batys Qazaqstan oblysynda koronavırýs juqtyrǵan naýqastar qalalyq kópbeıindi aýrýhanaǵa da ornalastyrylýda, dep habarlaıdy QazAqparat tilshisi.
BQO densaýlyq saqtaý basqarmasy málim etkenindeı, kúni búgin oblystyq juqpaly aýrýlar aýrýhanasynda 131 adam emdelýde.
Sonymen qatar, qalalyq kópbeıindi aýrýhanada 28 emdelýshi jatyr. Eki aýrýhanadaǵy naýqastardyń ishinde 11 adamnyń jaǵdaıy aýyr. Bul óńirde syrqattanǵandardyń kúrt kóbeıýine baılanysty bolyp otyr.
17 maýsymnyń ózinde oblysta 29 naýqas (ósim – 2,9 paıyz) tirkeldi. Sonyń 11-i – buryn aýyrǵandarmen qarym-qatynasta bolǵandar. 15-inen epıdemıologııalyq kórsetkish boıynsha, taǵy 3 adamnan profılaktıkalyq maqsatta synama alynǵan.
Bulardyń 24-i – Oral qalasynyń, úsheýi – Terekti aýdany jáne bir-birden Tasqala, Jánibek aýdandarynyń turǵyndary.
Osylaısha óńirde aýyrǵandar sany 1041-ge jetip, sonyń 670-i jazylyp shyqsa, altaýy kóz jumdy.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti naqtylaǵanyndaı, qazirgi tańda sondaı-aq 47 adam provızorlyq, 120 adam karantındik statsıonarda jatyr. 743 adam úılerinde oqshaýlanǵan.
Eske sala keteıik, budan buryn BQO-da koronavırýspen aýyrǵandardyń kóptigine baılanysty qosymsha oryndar ashylyp jatqanyn, juqpaly aýrýlar aýrýhanasynyń dırektory qyzmetinen ketkenin jazǵan bolatynbyz.