BQO-da koronavırýs juqtyrǵandar aýrýhanaǵa aýyr halde túsip jatyr
ORAL. QazAqparat – Batys Qazaqstan oblysynda koronavırýs juqtyrǵandar aýrýhanaǵa aýyr halde túsip jatyr, dep habarlaıdy QazAqparat tilshisi.
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnıkatsııalar qyzmeti alańynda málim etkenindeı, ásirese, dert jasy ulǵaıǵan jáne sozylmaly aýrýy bar adamdar arasynda aýyr ótýde.
«Ótken jazdaǵy jaǵdaı qaıtalanbas úshin turǵyndar barlyq aldyn alý sharalaryn saqtap, JRVI belgileri baıqalǵan sátte-aq medıtsınalyq kómekke júgingeni jón», dedi Gúlnár Maqsotqyzy.
Oblysta osy kezge deıin 14078 adam indet juqtyrsa, sonyń 11582-si nemese 82,2 paıyzy jazylyp shyqty, 224 adam kóz jumdy.
Qazirgi tańda karantındik statsıonarlarda 10 adam emdelýde. Al juqpaly aýrýlar statsıonarlarynda 274 adam em alýda. Sonyń ishinde 12-si jansaqtaý bóliminde jatsa, bulardyń bireýi – 50-60, beseýi – 60-80 jas aralyǵyndaǵylar, altaýy – seksennen asqandar. 10 naýqastyń sozylmaly derti bolsa, sonyń jeteýi júrek-qan tamyrlary aýrýlaryna, úsheýi qan dıabetine shaldyqqan.
Kúni búgin ınvazıvti emes jasandy tynys alý apparatyna 7, ottegi kontsentratoryna 8, ortalyqtandyrylǵan ottegi kózine 69 naýqas qosylǵan.
Eske sala keteıik, budan buryn Batys Qazaqstanda karantındik sharalar kúsheıtilgenin, naýryzda koronavırýs juqtyrǵandar sany 1 myńnan asqanyn jazǵan bolatynbyz.
