BQO-da koronavırýs juqtyrǵan sońǵy 11 naýqastyń 10-y Teńiz ken ornynan kelgen
ORAL. QazAqparat – Batys Qazaqstan oblysynda koronavırýs juqtyrǵan sońǵy 11 naýqastyń 10-y Teńiz ken ornynan kelgen, dep habarlaıdy QazAqparat tilshisi.
BQO ákimdiginen túsken málimetke qaraǵanda, olardyń bári de – oblys turǵyndary.
Kórshi óńirden kelýine baılanysty karantındik statsıonarǵa jatqyzylyp, zerthanalyq synama alynǵan.
Taǵy bir naýqas – 31 jastaǵy oblys turǵyny. Ol buryn koronavırýspen aýyrǵan adammen qarym-qatynasta bolǵan.
PTR dıagnostıkalyq zertteý qorytyndysymen 11 adamda COVID-19 dıagnozy rastalyp, barlyǵy da oblystyq juqpaly aýrýlar aýrýhanasyna ornalastyryldy.
Osylaısha BQO-da aýyrǵandar sany 266-ǵa jetip, sonyń 112-si emdelip shyqty.
Eske sala keteıik, budan buryn Batys Qazaqstanda 2 myńnan astam adamnyń úı karantıninde jatqandyǵyn jazǵan bolatynbyz.
