BQO-da koronavırýs juqtyrǵan eki jasar balanyń jaǵdaıy óte aýyr
ORAL. QazAqparat – Batys Qazaqstan oblysynda koronavırýs juqtyrǵan eki jasar balanyń jaǵdaıy óte aýyr, dep habarlaıdy QazAqparat tilshisi.
Oblystyq juqpaly aýrýlar aýrýhanasynyń dırektory Nadııa Ahmetovanyń aıtýynsha, sábı jasandy tynys alý apparatyna qosylǵan.
Aýrýhanada apparatqa qosylǵan taǵy úsh adam aýyr halde. Qazirgi tańda munda 132 naýqas em alýda.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, oblysta barlyǵy 376 adam koronavırýstan emdelip jatsa, 316-sy jazylyp shyqty.
Sondaı-aq 20 adam provızorlyq, 165 adam karantındik statsıonarda jatyr, úıinde oqshaýlanǵan 1266 adam dárigerlerdiń baqylaýynda.
Óńirde sońǵy tirkelgen 27 naýqastyń ekeýi – Reseıde jumys isteıtin Túrkistan oblysynyń turǵyndary. Samara oblysymen shektesetin «Syrym» avtoótkelinen ótkennen keıin olar karantındik statsıonarǵa jatqyzylǵan.
Buryn koronavırýsqa shaldyqqandarmen qarym-qatynasta bolǵan oblystyń 19 turǵynynan aýrý anyqtaldy. Sonymen qatar alty adamnan profılaktıkalyq maqsatta synama alynǵan, olardyń ekeýi – medıtsına qyzmetkerleri.
Osylaısha, aýyrǵandardyń jalpy sany 692-ge jetti. Oblysta indetke qarsy kúres jalǵasýda.
Eske sala keteıik, budan buryn Oralda úsh naýqastyń ókpeni jasandy jeldetý apparatyna qosylǵanyn jazǵan bolatynbyz.
https://kaz.inform.kz/news/koronavirus-oralda-ush-naukas-okpenizhasandy-zheldetu-apparatyna-kosylgan_a3656431
