BQO-da koronavırýs juqtyrǵan eki adam Ózbekstan azamaty bolyp shyqty
ORAL. QazAqparat – Batys Qazaqstan oblysynda koronavırýs juqtyrǵan ózbekstandyq azamattar bolyp shyqty. Bul týraly brıfıngte BQO taýarlar men kórsetiletin qyzmetter sapasy men qaýipsizdigin baqylaý departamentiniń basshysy Muhamǵalı Aryspaev málim etti, dep habarlaıdy QazAqparat tilshisi.
M.Aryspaevtyń aıtýynsha, 37 jáne 34 jastaǵy júk kóliginiń júrgizýshileri 8 sáýir kúni Máskeýden kelgen.
Samara oblysymen shekaradaǵy «Syrym» ótkizý beketinde epıdemıolog mamandar saýalnama júrgizip, atalǵan eki adam jedel járdem kóligimen birden provızorlyq gospıtalǵa jetkizildi. Ekeýinen de keshe zerthanalyq synama alynyp, koronavırýsqa shaldyqqany anyqtaldy.
«Kúnine 200-300-deı avtokólik ótetin «Syrym», sondaı-aq «Tasqala» jáne «Aqsaı» ótkizý beketterinde sanıtarlyq-epıdemıologııalyq sharalar kúsheıtilýde», dedi M.Aryspaev.
Eske sala keteıik, budan buryn batysqazaqstandyq volonterlerdiń polıtseıler men dárigerlerge ystyq tamaq jetkizgenin jazǵan bolatynbyz.
