BQO-da koronavırýs juqtyrǵan bes adam Teńiz ken ornynan kelgen
ORAL. QazAqparat – Batys Qazaqstanda koronavırýs juqtyrǵan sońǵy bes adam Atyraý oblysyndaǵy Teńiz ken ornynan kelgen, dep habarlaıdy QazAqparat tilshisi.
BQO ákimdiginen túsken málimetke qaraǵanda, olardyń bári de – óńir turǵyndary.
Barlyǵy indet juqtyrǵan naýqastarmen qarym-qatynasta bolǵandyqtan, karantındik statsıonarǵa jatqyzylǵan.
PTR dıagnostıkalyq zertteý qorytyndysymen COVID-19 dıagnozy naqtylanyp, beseýi de oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar medıtsınalyq baqylaýǵa alyndy.
Aýrý oshaqtarynda dezınfektsııalyq jumystar júrgizildi.
Osylaısha BQO-da aýyrǵandar sany 208-ge jetti.
Eske sala keteıik, budan buryn BQO ákiminiń koronavırýspen kúresip jatqan dárigerlermen baılanysqa shyqqanyn, sońǵy anyqtalǵan 4 naýqastyń úsheýi sheteldikter ekendigin jazǵan bolatynbyz.
