BQO-da koronavırýs juqtyrǵan azamat - 58 jastaǵy Oral turǵyny
ORAL. QazAqparat - Batys Qazaqstan oblysynda koronavırýs ınfektsııasyn juqtyrǵan 58 jastaǵy Oral qalasynyń turǵyny bolyp shyqty, dep habarlaıdy QazAqparat QR Prezıdenti janyndaǵy Tótenshe jaǵdaıdy qamtamasyz etý jónindegi Memleketik komıssııanyń Jedel tabyna silteme jasap.
Jedel shtab taratqan málimetterge qaraǵanda, naýqas koronavırýs ınfektsııasyn juqtyrǵan adammen qarym-qatynasta bolýyna baılanysty úı karantınine jatqyzylyp, zerthanalyq synama alynǵan.
PTR dıagnostıkalyq zertteý qorytyndysymen odan COVID-19 dıagnozy naqtylandy.
«Qazirgi tańda naýqastyń jaǵdaıy qanaǵattanarlyq. Oblystyq juqpaly aýrýlar aýrýhanasyna ornalastyryldy. Bekitilgen hattamaǵa sáıkes tıisti em júrgizilýde. Aýrý oshaqtarynda epıdemıologııalyq zertteý, dezınfektsııalyq jumystar júrgizilip jatyr»,-delingen habarlamada.
Aıta keteıik, Batys Qazaqstan oblysynda qazir koronavırýs juqtyrǵandar sany 63 adamǵa jetti, 2 adam indetten aıyǵyp ketti.
