BQO-da koronavırýs juqtyrǵan 4 adam júk tasymalymen aınalysatyn Ózbekstan azamaty bolyp shyqty

ORAL. QazAqparat - Memlekettik komıssııanyń shuǵyl shtaby Batys Qazaqstan oblysy men Shymkent qalasynda COVID-19 ınfektsııasyn juqtyrǵan adamdar týraly aqparat taratty, dep habarlaıdy QazAqparat.

Batys Qazaqstan oblysynda «COVID-19» ınfektsııasyn juqtyrǵan 2 azamat ta - júk tasymalymen aınalysatyn 25 jáne 27 jastaǵy Ózbekstan Respýblıkasy azamattary.

Reseı Federatsııasynyń Samara oblysymen shekaradaǵy «Syrym» avtoótkelindegi sanıtarlyq-karantındik bekette epıdemıolog mamandarmen qashyqtyq termometrııa jáne saýalnama júrgizý kezinde azamattardyń birinde dene qyzýy kóterilgeni anyqtaldy. Atalǵan azamattar is-áreket algorıtmine saı oqshaýlanyp, jedel járdem kóligi shaqyryldy.

Barlyq epıdemııaǵa qarsy is-sharalardy saqtaı otyryp, atalǵan azamattar provızorlyq statsıonarǵa jetkizilip, koronavırýs juqpasyna taldaý jasaldy.

PTR dıagnostıkalyq zertteý nátıjeleri boıynsha COVID-19 dıagnozy naqtylandy. Qazirgi ýaqytta oblystyq juqpaly aýrýlar aýrýhanasynda jeke bokstarǵa ornalastyryldy.

Naýqastarmen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alyndy.

Aýrý oshaqtarynda epıdzertteý jumystary, «Ulttyq saraptama ortalyǵy» BQO boıynsha fılıaly dezınfektsııa ortalyǵy mamandary dezınfektsııa júrgizdi.

Sońǵy málimet boıynsha, aımaqta COVID-19 koronavırýs ınfektsııasyna shaldyqqan 6 adam oblystyq juqpaly aýrýlar aýrýhanasyna em alýda.

Eske sala keteıik, keshe Batys Qazaqstanda koronavırýs juqtyrǵan eki adamnyń Ózbekstan azamattary bolyp shyqqanyn jazǵan edik.

Sondaı-aq, búgin Shymkentte de 4 adamnan koronavırýs tabyldy. 10 sáýir tańǵy saǵat 10:00-degi málimet boıynsha, Shymkenttegi jańadan anyqtalǵan naýqastar koronavırýs ınfektsııasyn juqtyrǵan adammen qarym-qatynasta bolýyna baılanysty karantındik statsıonarǵa jatqyzylyp, zerthanalyq synama alynǵan.

PTR dıagnostıkalyq zertteý qorytyndysymen COVID-19 dıagnozy naqtylandy. Qazirgi tańda naýqastardyń jaǵdaıy birqalypty. Bekitilgen hattamaǵa sáıkes tıisti em júrgizilýde.

Naýqastarmen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alynýda. Aýrý oshaqtarynda epıdemıologııalyq zertteý, dezınfektsııalyq jumystar júrgizilip jatyr.

10 sáýirdegi jaǵdaı boıynsha, qalada COVID-19 ınfektsııasyn juqtyrǵan jalpy 31 adam bar.