BQO-da koronavırýs juqtyrǵan 31 adam jansaqtaý bóliminde jatyr
ORAL. QazAqparat – Batys Qazaqstan oblysynda koronavırýs juqtyrǵan 31 adam jansaqtaý bóliminde jatyr, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda málim etkenindeı, oblysta osy kezge deıin 16842 adam aýyrsa, sonyń 13543-i nemese 80 paıyzy jazylyp shyqty.
261 adam kóz jumdy.
Bıyl 91 adam qaıtsa, sonyń ishinde qańtarda – 28-i, aqpanda – 15-i, naýryzda – 30-y, sáýirde 18-i ómirden ozdy. Olardyń 49-y – áıelder, 42-si – er adamdar.
Arman Talǵatulynyń sózine qaraǵanda, qaıtqandardyń 95 paıyzynda sozylmaly aýrýy bolǵan. Sonyń ishinde 71 paıyzy júrek-qan tamyrlary aýrýlary, 13 paıyzy qant dıabeti, 8 paıyzy basqa dertke shaldyqqan.
Qazirgi tańda 195 tósektik 4 karantındik statsıonarda 8 naýqas emdelýde.
Al 800 tósektik 10 ınfektsııalyq statsıonarda 579 adam jatyr. Bul aýrýhanalar 72,4 paıyzǵa tolǵan.
Jansaqtaý bóliminde jatqan 31 naýqastyń tórteýi – 50 jasqa deıingiler, beseýi – 50-60, 15-i – 60-80 jas aralyǵyndaǵylar, jeteýi – seksennen asqandar. 24 naýqastyń 17-si júrek-qan tamyrlary aýrýlary, jeteýinde qant dıabeti bar.
«Óńirde koronavırýsqa qarsy egý jumystary jalǵasýda. Kúni búginge deıin vaktsınanyń І komponentin 22360, ekinshisin 4231 adam aldy. Oblys boıynsha 30 medıtsına uıymynda ekpe kabınetteri demalys kúnderi de jumys jasaıdy. Ekpe alýǵa jazylý úshin adamdar ózderi tirkelgen emhanaǵa habarlasýy qajet», dedi A.Qalıbekov.
Eske sala keteıik, budan buryn BQO jýrnalısteriniń koronavırýs ekpesin alǵanyn, BQO-da karantın talaptaryn buzǵandarǵa 4,2 mln teńge aıyppul salynǵanyn jazǵan bolatynbyz.
