BQO-da koronavırýs juqtyrǵan 2 adamnyń avtobekette qyzýy kóterilgen
ORAL. QazAqparat – Batys Qazaqstan oblysynda sońǵy táýlikte tirkelgenderdiń barlyǵy oblys turǵyndary, dep habarlaıdy QazAqparat tilshisi.
BQO taýarlar men kórsetiletin qyzmetter sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, 15 sáýirden 16-syna qaraǵan túni úsh naýqas anyqtalǵan.
Budan buryn jazǵanymyzdaı, bulardyń ekeýi Reseıden kelgen bolatyn. Úshinshi adam da buryn koronavırýspen aýyrǵan adammen birge Reseıden kelgen bolyp shyqty.
Búgin tańda taǵy tórt naýqastyń qaýipti indetke shaldyqqany belgili boldy.
Bulardyń bireýi buryn koronavırýs juqtyrǵan syrqat adammen qarym-qatynasta bolǵan.
Qalǵan úsh adam 15 sáýir kúni Saratov oblysymen shektesetin «Tasqala» avtobeketindegi sanıtarlyq-karantındik beketten ótken kezde ekeýinen qyzýynyń kóterilgeni baıqalǵan. Olardyń bári jedel járdemmen karantındik statsıonarǵa jetkizilip, keıin COVID-19 juqtyrǵany naqtylandy.
Qazirgi kezde naýqastardyń barlyǵy oblystyq juqpaly aýrýlar aýrýhanasynda em alýda. Olarmen qarym-qatynasta bolǵan adamdar oqshaýlanyp, aýrý oshaqtarynda dezınfektsııa jumystary júrgizilýde.
Epıdemııaǵa qarsy jumystar jalǵasýda.
Osylaısha Batys Qazaqstan oblysynda sońǵy táýlikte 7 adam tirkelip otyr, aýyrǵandardyń jalpy sany 25-ke jetti. Olardyń bireýi jazylyp, úıine shyqty.
