BQO-da koronavırýs juqtyrǵan 150-den astam naýqas statsıonarlyq em alyp jatyr

ORAL. QazAqparat – Batys Qazaqstan oblysynda koronavırýs juqtyrǵan 153 naýqas ınfektsııalyq statsıonarlarda em alyp jatyr, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, sonyń 122-si Oral qalasyndaǵy modýldik aýrýhanada em alýda.

Qazirgi kezde statsıonarlar 17,6 paıyzǵa tolǵan. 15 patsıent aýyr halde, olardyń arasynda ınvazıvti jasandy tynys alý apparatyna qosylǵandar joq.

Oblysta sondaı-aq 511 adam ambýlatorlyq em alýda.

Basqarma málimetine qaraǵanda, pandemııa bastalǵannan beri barlyǵy 39 213, bıyl 29 992 naýqas tirkeldi.

Sońǵy aptada koronavırýs juqtyrý kórsetkishi 9,9 paıyzǵa tómendedi.

Jyl basynan beri aýyrǵan 2930 balanyń 2880-i jazylyp shyqty. 50-i saýyǵý ústinde.

Eske sala keteıik, budan buryn BQO-da koronavırýstan kóz jumǵandardyń 84,3 paıyzy egde jastaǵy adamdar ekenin jazǵan bolatynbyz.