BQO-da koronavırýs juqtyrǵan 13 turǵynnyń barlyǵy da Reseıden kelgen
ORAL. QazAqparat – Batys Qazaqstan oblysynda koronavırýs juqtyrǵan 13 turǵynnyń barlyǵy da Reseıden kelgen, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń málim etkenindeı, bular – Reseıdiń Máskeý qalasy men Saratov oblysynda biri vahtalyq ádispen, endi bireýleri jeke qurylystarda qyzmet atqaryp, elge qaıtyp kele jatqan azamattar.
Bulardyń eń jasy 19-da, úlkeni 49-da (olardyń altaýy – BQO-nyń, beseýi – Almaty oblysynyń, ekeýi – Túrkistan jáne Qaraǵandy oblysynyń azamattary). Olardyń bári «Tasqala» avtoótkelinen ótkennen keıin karantındik statsıonarǵa jatqyzylyp, zerthanalyq synama alynǵan kezde koronavırýs juqtyrǵany anyqtaldy.
Osylaısha BQO-da aýyrǵandar sany 116-ǵa jetse, sonyń altaýy jazylyp shyqty. 110-y oblystyq juqpaly aýrýlar aýrýhanasynda em alýda.
«Qazirgi tańda 25 adam provızorlyq, 89 adam karantındik statsıonarda jatsa, 1450 adam úıden baqylanýda. Qaýipti keseldiń odan ári órshimeýi úshin turǵyndardan karantındik shekteý talaptaryn qatań saqtaýdy ótinemiz», dedi N.Mustaev.
Eske sala keteıik, budan buryn Batys Qazaqstan 1400-ge jýyq adamnyń úıde oqshaýlanýda ekendigin, Oralda tórt ózbekstandyq azamattyń jazylyp shyqqanyn jazǵan bolatynbyz.
