BQO-da koronavırýs juqtyrǵan 11 adam jansaqtaý bóliminde jatyr
ORAL. QazAqparat – Batys Qazaqstan oblysynda koronavırýs juqtyryp, aýrýhanada jatqandar sany kóbeıip ketti, dep habarlaıdy QazAqparat tilshisi.
Oblystyq densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnıkatsııalar qyzmeti alańynda ótken brıfıngide málim etkenindeı, qazirgi tańda óńirde 333 tósektik alty juqpaly aýrýlar aýrýhanasynda 138 adam em alýda.
Jansaqtaý bóliminde jatqandar sany da artyp, 11 adamǵa jetti. Bulardyń bári de – 65 jastan asqandar. Іndet olardyń sozylmaly syrqatyn asqyntyp jibergen. Jeteýi artenzııalyq gıpertenzııamen aýyrsa, tórteýinde qant dıabeti bar. Medıtsınalyq kómekke kesh júgingendikten, olardyń ómirine qaýip tónip tur.
Oblysta úsh adam ottegi kontsentratoryna qosylǵan.
Tórt karantındik statsıonarda 41 adam jatyr.
Sondaı-aq pnevmonııaǵa shaldyqqan 149 adam emdelýde.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aıtýynsha, óńirde epıdemıologııalyq ahýal kún sanap nasharlap keledi.
Kúni búginge deıin oblysta 7142 adamnyń koronavırýs juqtyrǵany tirkeldi.
Qazan aıy bastalǵannan beri 161 adam dertke shaldyqsa, bulardyń 73-i (45,3 paıyzy) – zeınetkerler, 28-i (17,4 paıyzy) – jumyssyzdar, 29-y (18 paıyzy) – jumys isteıtinder, 15-i (9 paıyzy) – medıtsına qyzmetkerleri, 9-y (5,6) – muǵalimder men tárbıeshiler, ekeýi (1,2 paıyzy) – balalar.
Tek sońǵy táýlikte 49 adamnyń indet juqtyrǵany anyqtalsa, sonyń 18-i zeınetkerler bolyp otyr.
N.Mustaevtyń sózine qaraǵanda, 6 qazan men 6 qarasha aralyǵynda shekaradan 18983 adam ótse, sonyń 4791-i – jolaýshylar. Osynyń ishinde anyqtamasy joq 931 adam karantındik statsıonarǵa jatqyzylyp, 19-ynan indet tabyldy. Anyqtamasy joq 104 sheteldik azamat keri qaıtaryldy.
Sol sekildi 26 qazannan beri shekaradan ótken 5897 júrgizýshiniń 1541-inde anyqtama bolǵan joq. 10 júrgizýshiden koronavırýs anyqtaldy.
Mamandardyń aıtýynsha, indettiń taramaýy úshin turǵyndardyń ózderi densaýlyqtaryna jaýapkershilikpen qarap, sanıtarlyq talaptardy buljytpaı saqtaǵany abzal.
Eske sala keteıik, budan buryn BQO-da bes kúnde otbasylyq sharalardy jasaǵandarǵa 13 mln teńge aıyppul salynǵanyn jazǵan bolatynbyz.
