BQO-da koronavırýs Reseıde jumys istep kelgenderden anyqtaldy
NUR-SULTAN. QazAqparat – Batys Qazaqstan oblysynda koronavırýs indetine shaldyǵýdyń jańadan tirkelgen 6 jaǵdaıy týraly málimet berildi, dep habarlaıdy QazAqparat coronavirus2020.kz-ke silteme jasap.
15 sáýir kúni Qazaqstanda koronavırýsqa shaldyqqandar sany 1267-ge jetti. Onyń ishinde 6 jańa oqıǵa Batys Qazaqstan oblysynda tirkeldi.
4 naýqas – Batys Qazaqstan oblysynyń, 2 naýqas Aqtóbe oblysynyń turǵyndary.
«Birinshi jaǵdaıda, naýqas Reseı Federatsııasynan keldi. Reseı Federatsııasymen shekaradaǵy «Tasqala» beketinde sanıtarlyq-baqylaý beketiniń qyzmetkerleri saýalnama toltyryp, baılanyssyz termometrııamen teksergen kezde eshqandaı shaǵymy bolǵan joq. Kelgen sátten bastap úı karantıninde, medıtsına qyzmetkeriniń baqylaýynda boldy. 14 naýryzda dene qyzýynyń joǵarylaýyna baılanysty jedel járdem kómegine júgingen», - delingen aqparatta.
Ekinshi patsıent atalǵan birinshi naýqaspen birge turǵan. Onyń da dene qyzýy kóterilgen. Ol jaqyn baılanysta bolǵan adam retinde tirkeldi.
«Qalǵan 4 jaǵdaıda boıynsha, naýqastar – Reseı Federatsııasynda vahtalyq ádispen jumys isteıtin azamattar. RF shekaradaǵy «Tasqala« beketinde SBB qyzmetkerleri saýalnama toltyryp, baılanyssyz termometrııamen tekserdi. Shaǵymdary bolǵan joq. Keıin karantındik statsıonarǵa jatqyzyldy», - delingen resmı málimette.
PTR dıagnostıkalyq zertteý qorytyndysymen 6 patsıentte de COVID-19 dıagnozy naqtylandy. Barlyǵy ınfektsııalyq statsıonarǵa jatqyzyldy. Naýqastarmen qarym-qatynasta bolǵan adamdar anyqtalýda.
