BQO-da koronavırýs qaterine baılanysty Shalqar kóline kelýshilerge shekteý qoıyldy
ORAL. QazAqparat – BQO-nyń Terekti aýdanynda koronavırýstyń taralýyna jol bermeý úshin shekteý sharalary qabyldandy, dep habarlaıdy QazAqparat tilshisi.
Terekti aýdany bas memlekettik sanıtar dárigeriniń qaýlysyna sáıkes epıdemıologııalyq jaǵdaıdy eskere otyryp, Podstepnyı aýylynda ornalasqan barlyq mektepke deıingi balalar uıymdarynyń qyzmeti toqtatyldy.
Sonymen qatar Saryómir aýyly mańyndaǵy Shalqar kóline demalýshylardyń kelýine 30 maýsymǵa deıin shekteý qoıyldy.
BQO taýarlar men kórsetiletin qyzmetterdiń sapasy men qaýipsizdigin baqylaý departamentinen túsken málimetke sáıkes, Saryómir aýylyna aparatyn jolda blokposttar ornatyldy.
Budan basqa óńirde Qaratóbe aýdany Saraljyn aýyldyq okrýginde ǵana blokpost saqtalyp otyr, qalǵandary alyndy.
Oblysta osy kezge deıin 469 aýrý oshaǵynda 1069 naýqas anyqtalsa, sonyń 883-i Oralda tirkelgen. Sondaı-aq Báıterek aýdanynda – 51, Tasqalada – 32, Terektide – 25, Bórlide – 20, Syrymda – 19, Jánibekte – 14, Aqjaıyqta – 10, Jańaqalada – 7, Bókeı ordasynda – 4, Qaratóbe men Shyńǵyrlaýda 2 naýqas anyqtalǵan.
Aıta ketken jón, Shalqar kóliniń sýy shıpalylyǵymen erekshelenedi. Sondyqtan onyń jaǵasynda demalýshylar jaz kezinde kóbeıedi.
Eske sala keteıik, budan buryn Oralda Ulttyq ulan jaýyngerleriniń úıinde oqshaýlanǵan qarııalarǵa kómektesip júrgenin jazǵan bolatynbyz.
