BQO-da koronavırýs anyqtalǵan sońǵy naýqas — Reseıden oralǵan Shymkent turǵyny
ORAL. QazAqparat – Batys Qazaqstan oblysynda koronavırýs juqtyrǵan sońǵy naýqas shymkenttik turǵyn bolyp shyqty, dep habarlaıdy QazAqparat tilshisi.
Memlekettik komıssııanyń shuǵyl shtaby málim etkenindeı, Reseıde jumys isteıtin Shymkent qalasynyń 45 jastaǵy turǵynynan koronavırýs tabylǵan.
Samara oblysymen shektesetin «Syrym» avtoótkelinen ótken kezde onyń densaýlyǵyna shaǵymy bolmaǵanmen, algorıtmge sáıkes jedel járdem shaqyrylyp, karantındik statsıonarǵa jatqyzylǵan.
Zertteý qorytyndysymen COVID-19 dıagnozy qoıylyp, oblystyq juqpaly aýrýlar aýrýhanasyna aýystyryldy.
Naýqaspen qarym-qatynasta bolǵandar medıtsınalyq baqylaýǵa alynyp, aýrý oshaǵynda dezınfektsııalyq jumystar júrgizildi.
Osylaısha BQO-da aýyrǵandar sany 153-ke jetip, sonyń 10-y jazylyp shyqty. Syrqattardyń basym kópshiligi – Reseıden kelgender, 28-i – medıtsına qyzmetkeri.
Eske sala keteıik, budan buryn Oralda emdelip jatqandar dárigerlerge baǵynbaı, óz betimen úıge ketip qalmaq bolǵanyn, koronavırýs juqtyrǵandar arasynda dárigerge baǵynbaıtyn birneshe emdelýshiniń bar ekendigin, sondaı-aq stýdent qyzdyń emdelip shyqqandyǵyn jazǵan bolatynbyz.
