BQO-da koronavırýs anyqtalǵan balabaqsha karantınge jabyldy
ORAL. QazAqparat – Batys Qazaqstan oblysynda koronavırýs anyqtalǵan balabaqsha karantınge jabyldy, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń málim etkenindeı, Bórli aýdanyndaǵy bir balabaqshada tárbıeshiniń kómekshisinen koronavırýs tabyldy.
Naýqas JRVI belgilerimen emhanaǵa júgingen. PTR dıagnostıkalyq zertteý qorytyndysy onyń indet juqtyrǵanyn kórsetti.
Balabaqshada dezınfektsııalyq jumystar júrgizildi. Naýqaspen qarym-qatynasta bolǵan adamdar anyqtalyp, barlyǵynan synama alyndy. Qazir synamalar zerttelý ústinde.
Bórli aýdany bas memlekettik sanıtar dárigeriniń qaýlysymen atalǵan balabaqsha karantınge jabyldy.
«Sońǵy tórt táýlikte 18 adamnyń koronavırýs juqtyrǵany belgili bolsa, sonyń 13-i Oral qalasynyń, úsheýi Bórli aýdanynyń úlesine tıedi. Shyńǵyrlaý men Qaratóbe aýdandarynda bir-bir adamnan aýyrǵan. Solardyń ishinde 75-80 jastaǵy egde adamdar da bar. Jalpy, oblysta koronavırýstyń ósýi baıqalady», dedi M.Aryspaev.
Eske sala keteıik, budan buryn BQO-da koronavırýstan qaıtqandardyń 70 paıyzdan astamy egde adamdar ekendigin jazǵan bolatynbyz.
